Qazaqstan avtomobıl tasymaly boıynsha Serbııamen kelisim jasady
ASTANA. QazAqparat - Qazaqstan avtomobıl tasymaly boıynsha Serbııamen tıimdi kelisim jasady. Bul týraly QR Investıtsııalar jáne damý vıtse-mınıstri Roman Sklıar habarlady.
«2016 jyly Qazaqstan men Serbııa arasynda tasymaldanǵan júkterdiń kólemi 15 protsentke kóbeıip, 5,5 myń tonnany qurady. Sizderdiń nazarlaryńyzǵa usynylyp otyrǵan eki el arasyndaǵy avtomobıl tasymalyn júzege asyrý úshin quqyqtyq normalar bekitilip, avtotasymal túrleri reglamenttelýde, sondaı-aq blank almasýǵa ruqsat etetin kvota belgileý tártibi usynylǵan. Kelisimge sáıkes, ekijaqty jáne tranzıttik júkterdi tasymaldaý erkin túrde, al úshinshi elderge tasymaldaý ruqsat negizinde júzege asyrylady. Bul shart qazaqstandyq avtotasymaldaýshylar úshin tıimdi, sebebi Bolgarııa, Grekııa jáne Horvatııadan júk tasymaldaǵan kezde qazaqstandyq tasymaldaýshylar Serbııanyń aýmaǵyn paıdalanady», - dedi Sklıar «Qazaqstan Respýblıkasynyń Úkimeti men Serbııa Respýblıkasynyń Úkimeti arasyndaǵy halyqaralyq avtomobıl habarlamasy týraly Kelisimdi ratıfıkatsııalaý týraly» Zań jobasy talqylanǵan ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynda.
Depýtattardyń suraǵyna jaýap bere otyryp vıtse-mınıstr qazirgi tańda Qazaqstan men Serbııa arasynda jolaýshylar tasymalynyń júrgizilmeı jatqandyǵyn, alaıda bul múmkindiktiń kelisimde qarastyrylǵanyn atap ótti. Júkter eki baǵyt boıynsha tasymaldanýda: Reseı men Belarýs arqyly - soltústik baǵyt, Túrkııa arqyly - ońtústik baǵyt.
