Qazaqstan avtokólikpen Eýropaǵa júk jetkizý úshin balama baǵdar qarastyryp jatyr

Qazaqstan avtokólikpen júk tasymaldaý úshin Reseı men Belarýsty aınalyp ótetin balama baǵdar qarastyryp jatyr. Bul týraly Úkimet otyrysynda Kólik vıtse-mınıstri Sátjan Ablalıev aıtty, dep habarlaıdy Kazinform.

«Sońǵy jyldary avtotasymaldyń oń serpini Eýropa elderimen eksport/ımportta da baıqalýda. Ótken jyly osy baǵyttarda qazaqstandyq tasymaldaýshylardyń úlesi 13 paıyzǵa ósip 48 paıyzǵa jetti. Bul el ekonomıkasyna shamamen 80 mlrd teńgedeı qosymsha túsim ákeldi. Alaıda, búgingi tańda Belarýs pen Eýropa elderi arasyndaǵy ornalasqan 13 ótkizý pýnktiniń 8-i jáne Reseı men Fınlıandııa arasyndaǵy barlyq 8 ótkizý pýnktteri jabylǵan. Belarýs tarapynyń aqparaty boıynsha eýropalyq pýnktter jalpy qýatynyń 40 paıyzymen ǵana jumys jasaýda», - dedi Sátjan Ablalıev.

Onyń atap ótýinshe, bul jaǵdaı qazaqstandyq avtokólik quraldaryn Belarýs jáne Lıtva, Latvııa shekaralarynda uzaq merzim toqtap turýǵa májbúr etedi.

«Sondyqtan júkterdi Eýropaǵa jetkizýdiń balama joly retinde Túrikmenstan men Iran elderimen erkin tranzıtti qamtamasyz etý maqsatynda kelissózder júrgizdik. Bul baǵyttaǵy júk tasymalynyń quny men jetkizý merziminiń artatynyn atap ótken jón. Alaıda, atalǵan baǵyt sanktsııalyq júkterdi tasymaldaýǵa, sondaı-aq Eýropa elderi Reseı men Belarýs shekarany jaýyp tastaǵan jaǵdaıda birden-bir balama marshrýt sanalady»,- dedi vıtse-mınıstr.