Qazaqstan avtobıznesi naýryzda 40 paıyz ósimdi kórsetti
NUR-SULTAN. QazAqparat – Qazaqstan avtobıznes qaýymdastyǵynyń aqparatyna sáıkes, 2020 jyldyń alǵashqy úsh aıynda qazaqstandyqtar jańa jeńil kólikterdi, júk kólikterin jáne avtobýstardy satyp alýǵa 168 mlrd teńge jumsaǵan, dep habarlaıdy QazAqparat tilshisi.
Qazaqstannyń avtonaryǵy osy jyldyń qańtar-aqpan aılarynda qalypty saýda turaqtylyǵyn baıqatsa, naýryz aıynda 40 paıyzdyq ósimge jetken. Qaýymdastyqtyń habarlaýynsha, 2019 jyldyń naýryz aıymen salystyrǵanda bıyl naýryzda kólik saýdasy 40 paıyzǵa (6 377 jeńil avtokólik pen jeńil kommertsııalyq tehnıka, 493 júk kóligi, arnaıy tehnıka men avtobýs) artqan. Jalpy birinshi toqsanda el boıynsha 17 846 kólik (ótken jyldyń uqsas kezeńimen salystyrǵanda 30 paıyzǵa artyq) satylǵan.
«Kútilgenindeı naýryzda kólik satylymy 40 paıyzdyq ósimdi kórsetti. Eń birinshi kezekte buǵan halyqtyń avtokólikke degen surynysy, ulttyq valıýtanyń álsireýi aıasynda satyp alýshylardyń baǵanyń ósip ketýinen qaýiptenýi sebep. Áıtse de, naýryz aıynyń sońynda elde karantın jarııalanyp, mamandandyrylǵan HOQ-tar jabylyp qalǵandyqtan kólik tirkeý júıesi jumysyn toqtatty. Memleket qazirgi tańda kólikterdi onlaın rejımde tirkeýge ótkizip, dıllerlerdi jigerlendirýge baryn salýda. Sáýir avtobıznes úshin ońaıǵa túspeıin dep tur», - deıdi Qazaqstan avtobıznes qaýymdastyǵynyń vıtse-prezıdenti Anar Maqasheva.
Birinshi toqsannyń qorytyndysy boıynsha Ravon markasy aıtarlyqtaı ósimge qol jetkizgen. Alǵashqy toqsanda Qazaqstanda eń kóp satylǵan brendterdiń tórttigin Lada (3 539), Hyundai (3 094), Toyota (2 653), Ravon (1 873 avto) qurap otyr.
