Qazaqstan Avstrııadan basqa elderden iri qara maldy ákelý jumystaryn jalǵastyra bermek

ASTANA. 12 aqpan. QazAqparat - Avstrııa Qazaqstanǵa iri qara malǵa tıisti veterınarlyq saraptama jasamaı jóneltkenin moıyndady.

Bul týraly búgin QR Aýyl sharýashylyǵy mınıstri Asyljan Mamytbekov Úkimet otyrysynan keıin BAQ ókilderine málim etti.

«Maldy ákelmes buryn sol eldiń veterınarlyq qyzmeti arnaıy sertıfıkat bergen. Biraq, ol júmysty teksere kele, veterınarlyq sertıfıkat berý kezinde tıisti saraptamalar jasalmaı, qol qoıylǵandyǵy anyqtaldy. Ony Avstrııanyń veterınarlyq qyzmeti moıyndap otyr», - dedi mınıstr.

A. Mamytbekovtyń atap ótýinshe, sońǵy 2 jyldyń ishinde elimizge 35 myńǵa jýyq iri qara mal ákelindi. Al, mundaı úlken problema alǵash ret oryn alýda. Degenmen, Qazaqstan shetelden iri qara mal ákelý jumystaryn odan ári jalǵastyra beretin bolady. Biraq, Avstrııadan mal ákelýge shekteý qoıyldy.