Qazaqstan avıatsııasynda bıometrııa men tsıfrlyq júk tasymaly engiziledi
ASTANA. KAZINFORM — Qazaqstan Respýblıkasynyń Kólik vıtse-mınıstri Talǵat Lastaev Halyqaralyq áýe kóligi qaýymdastyǵynyń (IATA) vıtse-prezıdenti Rafael Shvartsmanmen jáne Ortalyq Azııa boıynsha óńirlik menedjeri Rızvan Sıdıkkımen kezdesý ótkizdi. Bul týraly vedomstvonyń baspasóz qyzmeti málim etti.
— Taraptar elimizdiń azamattyq avıatsııa salasyndaǵy basym mańyzy bar birqatar máselelerdi talqylady. Ushý qaýipsizdiginiń joǵary deńgeıin saqtaý, halyqaralyq standarttardy engizý jumystaryn jalǵastyrý, onyń ishinde jolaýshylarǵa qyzmet kórsetý kezindegi bıometrııalyq tehnologııalar, júk tasymalyn tsıfrlandyrý qajettiligi, sondaı-aq kadrlar daıarlaý, ınfraqurylymdy jańǵyrtý jáne t. b. boıynsha jobalardyń iske asyrylýyn atap ótti, — delingen habarlamada.
Talǵat Lastaev Qazaqstannyń IATA-men konstrýktıvti dıalogqa ashyq ekenin atap, barlyq mańyzdy máseleler boıynsha halyqaralyq tájirıbemen bóliskeni úshin rızashylyǵyn bildirdi.
Anyqtama IATA-álemdegi 300-den astam áýe kompanııany biriktiretin (álemdik áýe trafıginiń shamamen 85%) jetekshi úkimettik emes uıym. Ol salalyq standarttardy, qaýipsizdik erejelerin, áýejaılar men áýe kompanııalardyń kodtaryn belgileıdi jáne júkterdi tasymaldaýdy retteıdi. Eır Astana, SCAT jáne Vietjet Qazaqstan qazaqstandyq áýe kompanııalary IATA múshesi. Rafael Shvartsman 2010 jyldyń mamyrynan bastap Eýropa, TMD jáne Ortalyq Azııa elderin biriktiretin eń iri baǵyttardyń biri bolyp tabylatyn eýropalyq baǵytty qadaǵalaıtyn IATA Vıtse-prezıdenti.
Qazaqstannyń áýe keńistigin paıdalaný tártibi qandaı ekenin myna siltemeden oqyńyz.
