Qazaqstan avıatsııasy 2050 jylǵa deıingi damý baǵytyn aıqyndap jatyr
ASTANA. KAZINFORM — Qazaqstan avıatsııany damytýdyń uzaq merzimdi strategııasyn ázirlep, halyqaralyq habtar jelisin keńeıtýge, júk tasymalyn arttyrýǵa jáne áýejaılarǵa ınvestıtsııa tartýǵa basymdyq berip otyr. Bul týraly Azamattyq avıatsııa komıteti málimdedi.
Komıtettiń djereginshe, bıylǵy jyldyń toǵyz aıynda qazaqstandyq avıakompanııalar 12,4 mln jolaýshy tasymaldady, al áýejaılarda 136,5 myń tonna júk óńdelgen. Halyqaralyq marshrýttyq jeli 31 el men 137 baǵytty qamtıdy. Qazaqstandyq jáne sheteldik avıakompanııalar 24 jańa áýe baǵytyn ashty.
Salanyń aldaǵy kezeńge arnalǵan mindetterin iske asyrýmen qatar, Halyqaralyq azamattyq avıatsııa uıymymen (IKAO) birlesip, 2050 jylǵa deıingi master-jospar ázirlenýde. Qujat salany uzaq merzimdi damytý modelin aıqyndaýǵa baǵyttalǵan.
Basym baǵyttardyń qatarynda júk avıatsııasyn damytý da bar. Memleket otandyq júk tasymaldaýshylardy qoldaý sharalaryn kózdegen. Olardyń qatarynda júk áýe kemeleriniń jekelegen sanattaryn jeńildikpen ákelý jáne halyqaralyq naryqtarǵa shyǵý múmkindikterin keńeıtý bar.
Avıatsııa naryǵyna qatysýshylar da naqty damý josparlaryn usyndy. Astana áýejaıy 2035 jylǵa deıingi damý strategııasyn tanystyrdy. Ol ekinshi ushý-qoný jolaǵyn salýdy, júk ınfraqurylymyn keńeıtýdi jáne tsıfrlandyrýdy qamtıdy.
Qaraǵandy áýejaıy QarGo Hub tujyrymdamasyn damytýda jáne aǵymdaǵy jyly júk aǵyny 61 myń tonnaǵa deıin ósedi dep boljap otyr. Aqtaýda 400–500 mln AQSh dollary kóleminde áleýetti ınvestıtsııa tartýdy kózdeıtin avıatsııalyq-logıstıkalyq hab jobasy tanystyryldy.
Іshki áýe tasymaldarynyń qoljetimdiligine de erekshe nazar aýdaryldy. Petropavl áýejaıy shaǵyn óńirlik áýejaılardyń ekonomıkalyq turaqtylyǵyn qamtamasyz etý jáne odan ári damytý máselelerin kóterdi.
— SCAT avıakompanııasy Shymkentte avıatsııalyq habty damytýǵa arnalǵan aýqymdy baǵdarlamasyn tanystyrdy. Baǵdarlama áýe kemelerine tehnıkalyq qyzmet kórsetý salasyn damytý men áýejaı ınfraqurylymyn keńeıtýdi qosa alǵanda, 12 ınvestıtsııalyq jobany qamtıdy. Vietjet Qazaqstan ishki avıatsııa naryǵyn damytý jónindegi óz kózqarasyn usynyp, áýe tasymaldarynyń qoljetimdiligin arttyrý jáne salanyń turaqty ósýin qamtamasyz etý boıynsha usynystaryn bildirdi. Ulttyq júk tasymaldaýshy Alatau Air Cargo jaqyn ýaqytta ushýdy bastaýǵa daıyndalyp jatyr, — delingen habarlamada.
Sonymen qatar avıatsııany damytý salanyń barlyq qatysýshylarynyń ortaq mindeti retinde qarastyrylady. Saltanat Tompıeva avıakompanııalarmen, áýejaılarmen jáne naryqtyń basqa da qatysýshylarymen turaqty dıalog júrgizýdiń mańyzdylyǵyn atap ótti. Mundaı tásil memlekettik sheshimder qabyldaý kezinde salanyń naqty qajettilikterin eskerýge jáne tasymaldardy damytý jónindegi praktıkalyq qadamdardy birlesip aıqyndaýǵa múmkindik beredi.
