Qazaqstan avıatsııalyq oqıǵalardy tergeý salasynda IKAO tájirıbesin engizedi
ASTANA. KAZINFORM — Qazaqstan avıatsııalyq oqıǵalar men ıntsıdentterdi tergeý salasynda IKAO-men yntymaqtastyqty nyǵaıtady, dep habarlaıdy Kólik mınıstrliginiń baspasóz qyzmeti.
Kanadanyń Monreal qalasynda qazaqstandyq delegatsııanyń Halyqaralyq azamattyq avıatsııa uıymy (IKAO) Bas hatshysynyń mindetin atqarýshy, IKAO Áýe kóligi bıýrosynyń (ATB) dırektory Muhamed Rahmamen kezdesýi ótti.
Qazaqstandyq delegatsııa quramyna QR IKAO janyndaǵy Turaqty ókili Tımýr Tlegenov, QR Kólik mınıstrliginiń Kóliktegi oqıǵalar men ıntsıdentterdi tergeý departamentiniń dırektory Nurjan Malaev, «Kóliktegi oqıǵalar men ıntsıdentterdi tergep-tekserý ortalyǵy» AQ (budan ári — Ortalyq) Basqarma tóraǵasy Darhan Qatyshev, sondaı-aq Qazaqstannyń avıatsııalyq ákimshiligi men «Qazaeronavıgatsııa» RMK ókilderi kirdi.
IKAO delegatsııasynyń quramynda IKAO Aeronavıgatsııa bıýrosynyń (ANB) aeronavıgatsııa jáne ushý qaýipsizdigi jónindegi dırektordyń orynbasary Paskal Lýchıanı, IKAO ANB monıtorıng, qadaǵalaý jáne úılestirý jónindegi dırektordyń orynbasary Serkan Sımıtchıoǵlý, IKAO Áleýetti damytý jáne engizý bıýrosy dırektorynyń orynbasary Mıgel Marın, sondaı-aq IKAO hatshylyǵynyń qyzmetkerleri boldy.
Kezdesý barysynda qazaqstandyq delegatsııa jańadan qurylǵan Ortalyqtyń qyzmeti men aldaǵy damý josparlaryn tanystyrdy. Ortalyq — TMD memleketteri arasynda IKAO-nyń halyqaralyq standarttary men usynylatyn praktıkasyna sáıkes avıatsııalyq oqıǵalar men ıntsıdentterdi tergep-tekserý úshin qurylǵan alǵashqy mamandandyrylǵan organdardyń biri.
— Kezdesý qorytyndysy boıynsha Ortalyq pen IKAO arasynda Qazaqstandaǵy avıatsııalyq oqıǵalar men ıntsıdentterdi tergep-tekserý jónindegi jańa organnyń ınstıtýtsıonaldyq áleýetin nyǵaıtýǵa baǵyttalǵan kelisimge qol qoıyldy. Kelisim tergeý organynyń tehnıkalyq áleýetin arttyrýǵa baǵyttalǵan keshendi is-sharalardy iske asyrýdy kózdeıdi. Joba aıasynda IKAO-nyń bilikti sarapshylary Ortalyqtyń qoldanystaǵy múmkindikterine baǵalaý júrgizip, tergeýshilerdi daıarlaý qajettilikterine taldaý jasaıdy jáne zerthanany zamanaýı jabdyqtarmen áritehnıkalyq resýrstarmen qamtamasyz etý boıynsha usynymdar ázirleıdi, — delingen habarlamada.
Sondaı-aq IKAO aýdıti barysynda anyqtalǵan eskertýlerdi joıýǵa jáne avıatsııalyq oqıǵalar men ıntsıdentterdi tergep-tekserýdiń ulttyq júıesin odan ári jetildirýge erekshe nazar aýdarylady. Ortalyqtyń IKAO-men birlesken jumysy ushý qaýipsizdigi deńgeıin arttyrýǵa, tergep-tekserýdiń zamanaýı ádisteri men tehnologııalaryn engizýge, materıaldyq-tehnıkalyq bazany nyǵaıtýǵa jáne halyqaralyq avıatsııalyq qoǵamdastyqpen yntymaqtastyqty keńeıtýge yqpal etedi.
Ortalyq aldaǵy ýaqytta da halyqaralyq standarttardy engizý, tergeýshilerdiń kásibı quzyretterin arttyrý jáne avıatsııalyq oqıǵalarmen ıntsıdentterdi tergeýdiń zamanaýı ulttyq júıesin qalyptastyrý baǵytyndaǵy jumystardy jalǵastyrady.
Buǵan deıin IKAO Bas hatshysy Qazaqstannyń avıatsııa salasyndaǵy úlesin atap ótkenin jazǵan edik.
