Qazaqstan avıatsııalyq habtardy damytyp jatyr
ASTANA. KAZINFORM – Prezıdent Qasym-Jomart Toqaev «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýynda kólik-logıstıka salasyn odan ári damytý jáne jańǵyrtýdyń mańyzdylyǵyna toqtaldy.
Memleket basshysy avtomobıl jáne temirjol magıstraldaryn jańǵyrtý jumystaryn jedeldetýdi, avıatsııalyq habtardy, teńiz ınfraqurylymyn, konteınerlik tasymaldardy, tsıfrly logıstıkalyq servısterdi jáne halyqaralyq kólik dálizderin damytýdy tapsyrdy.
Úkimet Prezıdent tapsyrmalaryn oryndaý aıasynda kólik salasyn damytýdyń keshendi baǵdarlamasyn júzege asyryp keledi. Ol avtomobıl, temirjol, avıatsııa jáne teńiz kóligin qamtıdy. Sonymen qatar salaǵa tsıfrlyq tehnologııalar belsendi engizilip, halyqaralyq baǵyttar keńeıtilip, Qazaqstannyń Eýrazııadaǵy kólik-logıstıkalyq torap retindegi róli artyp keledi.
Búginde kólik salasy ulttyq ekonomıkanyń negizgi draıverleriniń birine aınalyp, eldiń jalpy ishki óniminiń shamamen 6,1%-yn qalyptastyryp otyr. Sońǵy bes jylda salanyń jalpy ónimi úsh esege jýyq ósip, 14 trln teńgeden asty. Bul tasymal kóleminiń turaqty ósýin, ınfraqurylymdy aýqymdy jańǵyrtýdy jáne Qazaqstannyń tranzıttik tartymdylyǵynyń artyp kele jatqanyn kórsetedi.
161 halyqaralyq baǵyt, 32 el jáne áýejaılardy jańǵyrtý: Qazaqstan avıatsııalyq habtardy damytýda
Azamattyq avıatsııany damytý Memleket basshysynyń tapsyrmalaryn júzege asyrýdyń negizgi baǵyttarynyń biri bolyp qala beredi. Keıingi bes jylda Qazaqstannyń avıatsııalyq qaýipsizdik salasyndaǵy ICAO standarttaryna sáıkestik deńgeıi 95,7%-ǵa jetti. Qazaqstanmen tikeleı áýe qatynasy bar elderdiń sany 25-ten 32-ge deıin, al halyqaralyq baǵyttardyń sany 74-ten 161-ge deıin artty.
Áýejaı ınfraqurylymyn jańǵyrtý jumystary da aýqymdy túrde jalǵasýda. 2026 jyly Arqalyq áýejaıyn jańǵyrtý jumystary aıaqtalyp, Astana, Almaty jáne Qostanaı baǵyttaryndaǵy turaqty áýe reısteri qaıta jandandy.
Jyl sońyna deıin Zaısan jáne Katonqaraǵaı aýdandarynda, sondaı-aq Kendirli kýrorttyq aımaǵynda jańa áýejaılardyń qurylysyn aıaqtaý josparlanyp otyr.
2029 jylǵa deıin Astana, Almaty, Shymkent, Taraz, Aqtóbe, Oral jáne Jezqazǵan qalalarynda ushý-qoný jolaqtaryn salý jáne rekonstrýktsııalaý, sondaı-aq elimizdiń iri áýejaılarynyń termınaldaryn jańǵyrtý kózdelgen. Bul jobalardy júzege asyrý áýejaılardyń ótkizý qabiletin arttyrýǵa, jolaýshylarǵa qyzmet kórsetý sapasyn joǵarylatýǵa jáne zamanaýı avıatsııalyq habtardy qalyptastyrý úshin jaǵdaı jasaýǵa múmkindik beredi.
Sonymen bir mezgilde halyqaralyq tasymaldardyń geografııasy da keńeıýde. Jyl basynan beri Armenııa, Kıpr, Qytaı, Mońǵolııa, Grýzııa, Ázirbaıjan, Polsha, Túrkııa, Ózbekstan jáne Reseı baǵyttary boıynsha jańa reıster ashyldy. Jyl sońyna deıin Almaty – Úrgenish, Almaty – Tokıo, Aqtóbe – Baký, Almaty – Chýntsın, Hanoı – Almaty – Praga jáne Astana – Inın, Oral – Máskeý boıynsha jańa baǵyttar iske qosylady dep kútilýde.
2025 jyldyń qorytyndysy boıynsha avıakompanııalar 15,4 mln jolaýshy tasymaldady, áýejaılar 31,8 mln adamǵa qyzmet kórsetti jáne 173,3 myń tonna júkti óńdedi. Osylaısha saladaǵy oń serpin saqtalyp otyr.
