Qazaqstan avıatsııa salasynda kadr daıarlaýdyń jańa kezeńine qadam basty
ALMATY. KAZINFORM — Almatyda jańa mamandyqtar men quzirettilikterdiń salalyq atlasyn ázirleýge arnalǵan sarapshylyq keńes ótti. Oǵan memlekettik organdar, áýe kompanııalary, áýejaılar, sondaı-aq salalyq kásiporyndar men sarapshylar qaýymdastyǵynyń ókilderi qatysty.
Sharaǵa Qazaqstandaǵy ICAO Álemdik elshiler baǵdarlamasynyń elshisi, QR Kólik mınıstrligi Azamattyq avıatsııa komıtetiniń tóraıymy Saltanat Tompıeva, Azamattyq avıatsııa akademııasynyń rektorynyń m.a Qaırat Jakýpov, QR Ǵylym jáne joǵary bilim mınıstrliginiń Joǵary jáne JOO keıingi bilim komıtetiniń tóraıymy Gúljan Jarasova qatysty.
Kezdesýde usynylǵan jańa mamandyqtar men quzirettilikter atlasy jobasy salanyń negizgi qatysýshylarymen – áýe kompanııalary men avıatsııalyq kásiporyndarmen birge talqylanyp, qoldaý tapty.
– Atlasta aldaǵy 15 jylda suranysqa ıe bolatyn mamandyqtar men negizgi daǵdylar tizimi kórsetilgen. Álemde áýe tasymaly aıtarlyqtaı kóbeıip jatqandyqtan, joǵary bilikti mamandarǵa suranys arta beredi. Kadr áleýetin arttyrý – ICAO Jahandyq elshiler baǵdarlamasynyń basty mindetteriniń biri. Salalyq mamandyqtar men quzirettilikter atlasy kadrlardy daıarlaýda jalpy túsinikten naqty is-áreketterge kóshýge, sondaı-aq salada birińǵaı baǵyttardy belgileýge múmkindik beredi,– dep atap ótti Saltanat Tompıeva.
Atlastyń basty nátıjeleriniń biri – tsıfrlandyrý, jasandy ıntellekt, turaqty damý jáne ushqyshsyz tehnologııalarmen baılanysty jańa mamandyqtardyń paıda bolýy. Erekshe mamandyqtardyń qatarynda: áýe qozǵalysyn basqarý baǵytyndaǵy JI-men jumys isteıtin jobalaýshy jáne ıntellektýaldy dıspetcherlik júıelerdi ázirleýshi, ushqyshtardyń psıhologııalyq tózimdiligin qamtamasyz etetin kıberpsıholog pen koýchtar, sýtegi qaýipsizdigi ınjeneri jáne SAF jetkizý tizbeginiń mamany (avıatsııanyń ekologııalyq jańǵyrýyna jaýapty jańa energetıka salasynyń mamandary), «emotsııalyq logıstıka» taldaýshy mamany, jolaýshylarǵa yńǵaıly qyzmetti josparlaıtyn sáýletshi jáne taǵy basqalary bar. Sonymen birge, ushqyshsyz avıatsııa salasyna da erekshe nazar aýdarylǵan. Bul salada UAJ operatorlarynan bastap platformalardy jasaıtyn mamandar men robot tehnıka ınjenerlerine deıingi barlyq mamandyqtar qajet bolady.
Bolashaqta ushqyshtar, ınjenerler jáne dıspetcherler avtomattandyrylǵan júıelermen, jasandy ıntellektpen jáne tsıfrlyq kóshirmelermen tyǵyz jumys jasaıtyn bolady. Sol sebepti Atlas qolmen derekterdi óńdeý, az avtomattandyrylǵan jerústi qyzmetteri, qarapaıym dıspetcherlik jáne logıstıkalyq jumystarǵa baılanysty mamandyqtardyń ózektiligi azaıatynyn kórsetedi.
Tehnologııa damysa da, salada basty róldi adamdar atqara beredi. Qazirdiń ózinde avıatsııa salasynda mamandar jetispeıdi jáne bul qajettilik 2029 jylǵa qaraı edáýir ósýi múmkin. Osyǵan baılanysty IKAO-nyń Jahandyq elshiler baǵdarlamasynyń elshisi Saltanat Tompıeva Qazaqstan adam kapıtalyn damytýǵa erekshe nazar aýdaryp otyrǵanyn atap ótti. Bul IKAO-nyń 2050 jylǵa deıingi Strategııalyq josparyna da sáıkes keledi, sonymen qatar, bul baǵyttaǵy jumystar Argentına, Ulybrıtanııa, Grýzııa, Italııa, Kanada, Japonııa sııaqty elderdiń 25 sala ókilinen jáne Gaıana, Portýgalııa men Shrı-Lankanyń 3 óńirlik chempıonynan turatyn IKAO-nyń Jahandyq elshiler baǵdarlamasy arqyly júzege asyrylyp jatyr.
Qatysýshylardyń aıtýynsha, Atlas birneshe máseleni birden sheshedi – memleketke kadr saıasatyn jáne bilim berý tapsyrysyn josparlaýǵa, bızneske qyzmetkerlerdi damytýǵa, sondaı-aq avıatsııa salasyn tańdaıtyn jastarǵa baǵyt-baǵdar beredi.
Eske sala keteıik, buǵan deıin Qazaqstannyń halyqaralyq avıatsııalyq saıasattaǵy múmkindigi keńeıgenin jazdyq.
