Qazaqstan avıatorlary Halyqaralyq azamattyq avıatsııa kúnin atap ótti
ASTANA. 7 jeltoqsan. QazAqparat. 7 jeltoqsanda QR Kólik jáne kommýnıkatsııa mınıstrliginde mınıstr Berik Kamalıevtiń qatysýymen Halyqaralyq azamattyq avıatsııa kúnine arnalǵan saltanatty jınalys bolyp ótti,
dep habarlaıdy vedomstvonyń baspasóz qyzmeti.
Mınıstr B.Kamalıev azamattyq avıatsııa komıtetiniń qyzmetkerlerin kásibı merekelerimen quttyqtaı otyryp, birqatar qyzmetkerlerge mınıstrliktiń qurmet gramotalaryn tapsyrdy. Óziniń quttyqtaý sózinde ol joǵary tehnologııaly azamattyq avıatsııany damytýdyń ekonomıkanyń turaqtylyǵy jáne elimizdiń gúldenýi úshin óte mańyzdy ekenin atap ótti. Qazirgi tańdaǵy basty mindetterdiń qatarynda - ushý qaýipsizdigi deńgeıin kóterý jáne Eýroaımaqqa ushýǵa salynǵan shekteýlerdi joıý.
Anyqtamalyq: Halyqaralyq azamattyq avıatsııa kúnin BUU Bas Assambleıasy resmı mereke dep jarııalap, Halyqaralyq azamattyq avıatsııa jónindegi Konventsııanyń qol qoıylǵanyna 50 jyl tolýyna oraı 1994 jylǵy 7 jeltoqsannan bastap atap ótile bastady. Osy konventsııaǵa sáıkes Birikken Ulttar Uıymynyń arnaıy mekemesi Halyqaralyq azamattyq avıatsııa uıymy (IKAO) qurylǵan bolatyn.
