Qazaqstan avıaotyn óndirý kólemin rekordtyq 825 myń tonnaǵa jetkizbek
ASTANA. KAZINFORM- Qazaqstanda bıyl 750 myń tonna avıatsııalyq otyn óndirý josparlanǵanymen, jyl qorytyndysynda óndiris kólemin 825 myń tonnaǵa jetkizý kózdelip otyr. Bul ótken jylmen salystyrǵanda 13%-ǵa kóp.
QR Energetıka mınıstrliginiń habarlaýynsha, 8 aıdyń qorytyndysy boıynsha 591 myń tonna avıatsııalyq otyn óndirildi. Osy rette byltyr 726 myń tonna avıaotyn óndirilgenin aıta ketý kerek.
Energetıka mınıstrligi avıatsııalyq otyn óndirisin ulǵaıtý jáne ishki naryqty qamtamasyz etý baǵytynda turaqty jumys júrgizip jatyr.
Aldaǵy ýaqytta óndiris kólemin kezeń-kezeńimen arttyrý josparlanyp, 2031 jylǵa qaraı ony 1,5 mln tonnaǵa deıin jetkizý kózdelip otyr.
- Qazaqstannyń azamattyq avıatsııasynyń, kúshtik qurylymdardyń, azamattyq qorǵaý organdarynyń jáne memlekettik materıaldyq rezerviniń qajettilikteri otandyq avıatsııalyq otyn esebinen tolyq qamtamasyz etiledi. Jolaýshylar avıatsııasynyń ishki jyldyq qajettiligi 680 myń tonnany quraıdy, - delingen habarlamada.
Aıta keteıik, Parlament palatalarynyń birlesken otyrysynda Memleket basshysy Qasym-Jomart Toqaev avıotyn boıynsha myqty ınfraqurylym qalyptastyrýymyz qajet ekenin aıtqan bolatyn.
