Qazaqstan avıakompanııalarynan 6 eksplýatant sertıfıkaty men 1 avıatsııalyq jumystardy júrgizýge quqyq beretin kýálik keri qaıtaryldy

dep habarlady QR Kólik jáne kommýnıkatsııa mınıstrliginiń baspasóz qyzmetinen.

Vedomstvonyń atap ótýinshe, ótken jyldyń qańtarynan Tehnıkalyq yntymaqtastyq bıýrosynyń sarapshylary Qazaqstannyń avıatsııalyq qyzmetine qajetti qoldaý kórsetýde. Birlesken jumys nátıjesinde 2009 jylǵy IKAO aýdıtiniń eskertpelerin joıý úshin Áýe keńistigin paıdalaný jáne avıatsııa qyzmeti týraly QR qoldanystaǵy zańnamasyna 80 túzetý engizildi. Onyń 69-y ushý qaýipsizdigin arttyrý máselelerin qamtıdy.

«Odan basqa el avıakompanııalarynyń barlyǵy resertıfıkattaýdan ótkizildi. Nátıjesinde 6 eksplýatant sertıfıkaty jáne 1 avıatsııalyq jumystardy ótkizýge quqyq beretin kýálik keri qaıtaryldy (DETA, MEGA, Evro-Azııa Interneıshenl, SAMAL, Semeıavıa, Azııa Kontınetal Eırlaıns)», - delingen habarlamada.

Sondaı-aq mınıstrlik aqparatyna sáıkes, Azamattyq avıatsııa komıteti avıatsııalyq bilimi jáne osy saladaǵy tájirıbesi bar bilikti mamandarmen tolyǵymen jasaqtalǵan. Avıakompanııalar, áýe kemeleri, áýejaılar, navıgatsııa nysandary, oqý ortalyqtary jáne ekıpaj músheleri men ınjenerlerdiń biliktilik dárejesin tekseretin 40 kásibı ınspektor jumys isteýde.