Qazaqstan aýyr atletıkadan álem chempıonatynyń ekinshi medalin jeńip aldy
ASTANA. QazAqparat – Bogotada (Kolýmbııa) aýyr atletıkadan 2022 jylǵy álem chempıonatynda erler arasynda 96 kelige deıingi salmaq dárejesinde jarys ótti, dep habarlaıdy QazAqparat Sports.kz-ke silteme jasap.
Bahreın atynan shyqqan kolýmbııalyq Lesman Paredes qossaıysta 397 keli (julqa kóterýde - 185, serpe kóterýde - 212) kóterip, jeńiske jetti. Ekinshi oryndy qazaqstandyq Nurǵısa Ádiletuly - 383 (174 + 209) ıelense, kolýmbııalyq Djor Moreno - 380 (171 + 209) qola júldeger atandy.
Aıta keteıik, Qazaqstan úshin bul medal álem chempıonatyndaǵy ekinshi medal boldy - buǵan deıin Alekseı Chýrkın 73 kelige deıingi salmaqta qola júldeger atanǵan bolatyn.
Foto: olympic.kz
