Qazaqstan aýylsharýashylyq salalaryn tıimdi ornalastyrýdy 2020 jyly aıaqtaýdy josparlaýda
Bul týraly búgin QR AShM-de ótken baspasóz máslıhatynda «QazAgroInnovatsııa» AQ basqarmasy tóraǵasynyń orynbasary Ázimhan Satybaldın málim etti. Onyń aıtýynsha, kartany ázirleýge respýblıkanyń jetekshi agrarlyq ǵalymdary men óndiris mamandary qatysty. Bunyń nátıjesinde aýyl sharýashylyǵyna arnalǵan jerlerdi ońtaıly paıdalaný maqsatynda QR-nyń mamandandyrý kartasy usynylyp otyr.
«Búgingi kúni eń bastysy elimizdiń aýyl sharýashylyǵyn básekege qabiletti etý maqsaty tur. Osy oraıda, sýbsıdııa, kepildik nesıe berý, ınfraqurylymdy damytý syndy memlekettik baǵdarlamalar karta aıasynda rentabeldiligi joǵary jobalarǵa bólinetin bolady. Al ol jobalar ár aımaqtar boıynsha atalmysh shemada kórsetilgen, kartanyń maqsaty da sol - aýylsharýashylyq salalaryn tıimdi ornalastyrý, aımaqtardy ózine saı kásipterge mamandandyrý bolyp tabylady», - dedi ol.
Quzyrly kompanııanyń ókiliniń sózine qaraǵanda, jergilikti tabıǵat resýrstaryn utymdy paıdalanýǵa atalmysh karta múmkindik beredi. Bul kartanyń negizinde tabıǵattyq-klımattyq, jaýyn-shashyn deńgeıi, topyraqtyń qunarlyǵy, ósimdiktiń ósý merzimi, temperatýralyq jıyntyǵy, jaıylymdyq jerlerdi qoldanýdyń merzimdik uzaqtyǵy, jerlerdi sýlandyrýdyń jaramdy sý kózderi syndy faktorlar eskerildi.
«Shema aıasynda ár ákimshilik aýmaq úshin ónimniń naqty túrlerin ónerkásiptik óndirý usynylady. Mysaly, shema sheńberinde sútti mal sharýashylyǵyn Mańǵystaý oblysynyń nashar azyq bazasy bar qurǵaq aýdandarynda, sondaı-aq Atyraý, Batys Qazaqstan jáne Qyzylorda oblystarynyń kóptegen aýdandarynda damytý tıimdi emes. Ósimdik sharýashylyǵy salasynda, máselen, júgerini dánge óndirý úshin eldiń ońtústiginde Almaty, Jambyl, Ońtústik Qazaqstan jáne Qyzylorda oblystarynyń kóptegen aýdandarynda ósirýge bolady», - deıdi ol.
Shemany engizý úderisi oblystardyń damý baǵdarlamalarymen qarastyrylyp, 2020 jylǵa deıin aıaqtalýy tıis.