Qazaqstan aýylsharýashylyq ónimderimen 1,5 mıllıard adamdy qamtamasyz ete alady - Almatydaǵy konferentsııa
ALMATY. Qyrkúıektiń 2-si. QazAqparat /Názıra Eleýhan/ - Qazaqstan óziniń aýylsharýashylyq egistikteriniń resýrstary men klımattyq erekshelikterine qaraı, aýylsharýashylyq ónimderimen 1,5 mıllıard adamdy qamtamasyz ete alady.
Bul týraly búgin Almatyda «Terra Madre-Kazakhstan» festıvali aıasynda "Tabıǵı organıkalyq aýylsharýashylyq jáne salaýatty tamaq ónimderi, qaýipsizdik azyq -túliktiń negizi retinde" degen taqyryppen ótip jatqan konferentsııa barysynda Qazaq ulttyq agrarlyq ýnıversıtetiniń ǵylym jónindegi prorektory Sansyzbaı Abylaı aıtty, dep habarlaıdy QazAqparat.
Onyń aıtýynsha, elimizde aýylsharýashylyq ónimderiniń óndirisin ósirý potentsıaly bolyp tabylatyn 100 mıllıon gektar jer resýrstary qoldanylmaıdy. "Al, organıkalyq aýylsharýashylyq óniminiń halyqaralyq naryǵy jyl saıyn orta eseppen alǵanda 15-20 paıyzǵa ósip jatyr. Sońǵy jyldardaǵy qymbatshylyqqa baılanysty otandyq fermerler pestıtsıdter men gerbıtsıdterdi qoldanbaıdy. Bul organıkalyq aýylsharýashylyǵyn damytýǵa jaǵymdy jaǵdaılar jasaýda", dedi Sansyzbaı Abylaı.
Ol sonymen qatar, "Elimizdegi tarıhı qalyptasqan dástúrli mal jaıylymdarynyń arqasynda úı janýarlary jabaıy shóptermen qorektenip, jyl boıy qorada turýdy qajet etpeıtindikten, bul da organıkalyq aýyl sharýashylyqty damytýǵa qolaıly jaǵdaı", dep atap ótti.
Onyń aıtýynsha, organıkalyq ettiń, sút ónimderiniń, jemister men kókónisterdiń, sonymen qatar, jańǵaqtar men dándi ónimderdiń álemdik naryǵy qalyptasý ústinde jáne óz deńgeıinde damymaǵan. "Sondyqtan, bizdiń el úshin joǵarǵy oryndarǵa shyǵýǵa úlken múmkindikter bar jáne aımaqtyq deńgeıde iri oıynshy emes, al álemdik deńgeıdegi iri oıynshy bolýymyzǵa ábden bolady", dep atap ótti ol.
