Qazaqstan aýyldarynda stomatologtar jetispeıdi
ASTANA. QazAqparat - Aýyldyq jerderde ornalasqan eldi mekenderde stomatolog-dárigerlerdiń tapshylyǵy sezilýde, dep habarlaıdy «QazAqparat» HAA tilshisi.
Bul jóninde Biryńǵaı Qazaqstan stomatologtary qaýymdastyǵynyń prezıdenti (EKAS), medıtsına ǵylymdarynyń doktory, IDA Dúnıejúzilik stomatologııa akademııasynyń akademıgi Sáýle Esembaeva búgin Stomatologtardyń halyqaralyq kongresine arnalǵan baspasóz máslıhatynda málim etti.
«Taǵy bir aıta keterlik jaıt, stomatolog-dárigerlerdiń jetispeýshiligi. Paradoks, jyl saıyn 6 fakýltetten stomatolog-dárigerler túlep ushsa da, elimizdiń keı óńirlerinde maman tapshylyǵy oryn alyp otyr. Ásirese maman tapshylyǵy Qazaqstannyń batys jáne soltústik bóligindegi aýyldyq eldi mekenderde seziledi», - dedi Sáýle Esembaeva.
Sondaı-aq, qaýymdastyq prezıdenti balalar stomatology men jaq-bet hırýrgtarynyń jetispeýshiligin erekshe atap ótti.
«Baıaǵydaı stýdentterdi joldamamen aýyl-aýyldarǵa jibermeıdi. Osy sebepti, mamandardyń kópshiligi stomatalogııa salasynan qol úzip ketedi. Dál qazir balalar stomatology men jaq-bet hırýrgtary jetispeı jatyr, sondyqtan bul máseleni erekshe nazarda ustap otyrmyz», - dedi ol.
Óz kezeginde «Stomatologııadaǵy ınnovatsııalar» atty Stomatologtardyń halyqaralyq kongresine qatysý úshin Astanaǵa arnaıy kelgen Dúnıejúzilik stomatologtar federatsııasynyń prezıdenti Patrık Heskot aýyz qýysyn saý saqtaý úshin qarapaıym qaǵıdalardy ustaný kerektigin aıtty.
«Aýyz qýysy aýrýynyń sebepteri óte kóp jáne oǵan qarsy sıqyrly dárini áli oılap tapqan joq. Qarapaıym qaǵıdalardy ustaný arqyly aýrýlardyń 90%-ynyń asqynýynyń aldyn alýǵa bolady. Birinshiden, qant jeýdi toqtatý kerek, qant aýyz qýysynyń №1 jaýy. Ekinshiden, aýyz qýysynyń tazalyǵyn saqtaý jáne kem degende, jylyna bir ret tis dárigerine tekserilip turý kerek», - dedi P.Heskot.
Dúnıejúzilik stomatologtar federatsııasynyń basty maqsaty álem boıynsha aýyz qýysy aýrýlarynyń aldyn alý jáne federatsııa quramynda álemniń 140 elinde jumys isteıtin 1 mıllıonnan astam tis dárigerleri bar.
