Qazaqstan aýyl sharýashylyǵynyń negizgi kórsetkishteri boıynsha 90-jyldardyń deńgeıine áli de jete alǵan joq

Búgin elimizdiń mal sharýashylyǵy salasyn damytý taqyrybynda Parlament Májilisinde ótken Úkimet saǵatynda Aýyl sharýashylyǵy mınıstri Aqylbek Kúrishbaev osylaı málim etti.

«Burynǵy jospardy ekonomıka zamanynda elimizdiń mal sharýashylyǵy aıtarlyqtaı deńgeıge kóterildi. Keıin el ekonomıkasy naryqtyq qatynasqa kóshken ótpeli kezeńde mal sharýashylyǵy qatty quldyrap ketti. Máselen, 1990-2000 jyldar aralyǵynda mal basy orta eseppen 56 paıyzǵa azaıyp, óndiriletin ónimderdiń mólsheri 86,5 paıyzǵa kemigen. Asyl tuqymdy mal sharýashylyqtarynyń sany - 3 esege, al ondaǵy mal basy 17 esege azaıdy. Jumys istep turǵan 62 qus fabrıkasynyń jartysyna jýyǵy óz jumystaryn toqtatty. Sonyń saldarynan mal ónimderiniń tutyný kólemi kúrt tómendep, elimiz et boıynsha óziniń eksporttyq qabiletin joǵaltty da, qus etinen ımportqa táýeldi bolyp qaldy», - dedi A. Kúrishbaev.

Sonymen qatar sońǵy 10 jylda mal sharýashylyǵyndaǵy qordalanǵan problemalardy sheshý maqsatynda birqatar keshendi jumystar júzege asyrylǵan. Mınıstrdiń aıtýynsha, mundaı keshendi sharalar atalǵan saladaǵy quldyraýdy toqtatyp, onyń turaqty túrde damýyna múmkinshilik týdyrdy. Máselen, osy ýaqyt aralyǵynda mal basy orta eseppen 44 paıyzǵa ósken. Toqtap qalǵan 14 qus fabrıkasy óz jumysyn qaıta bastap, 8 jańa óndiris iske qosylǵan. Osynyń arqasynda qus etiniń ımport kólemi 70 paıyzdan 58 paıyzǵa tómendedi.

«Asyl tuqymdy mal sharýashylyqtarynyń sany 37 paıyzǵa kóbeıip, ondaǵy mal basynyń úlesi 2-3 esege artty. Degenmen, osynyń ózinde biz mal sharýashylyqtarynyń negizgi kórsetkishteri boıynsha 90-shy jyldardyń deńgeıine áli de jete alǵan joqpyz. Eginshilikke qaraǵanda mal sharýashylyǵy tehnıkalyq jáne tehnologııalyq jabdyqtalý jaǵynan kenje qalyp otyr», - dedi A. Kúrishbaev.