Qazaqstan aýyl sharýashylyǵyn damytýǵa ekpin qoıyp otyr - Elbasy

NUR-SULTAN. QazAqparat - Búgin Astana ekonomıkalyq forýmynda Elbasy Nursultan Nazarbaev Qazaqstanda qurylǵan ınfraqurylym laıyqty nátıje beretinin aıtty, dep habarlaıdy QazAqparat tilshisi.

«Búginde eldiń jalpy halyqaralyq rezervteri 90 mlrd AQSh dollarynan asyp tústi, 18 mıllıon halqy bar memleket úshin bul qomaqty qarjy. Bul óz kezeginde bizdiń ІJÓ-niń 40 paıyzynan astam. Sondyqtan ındýstrıaldyq baǵdarlamany iske asyrýdy qolǵa alyp, qaıta óńdeý ónerkásibin qurýdy bastadyq. Osy óńdeý ónerkásibi jyl saıyn 20 paıyz qarqynmen ósedi. Biz 6 jyl ishinde 1 300 jańa kásiporyndy qurdyq», - dedi N. Nazarbaev forým barysynda.

Sonymen qatar Elbasy eldiń damýyna sapaly joldardyń mańyzy zor ekenin, osy oraıda Qazaqstanda tranzıttik múmkindikterdi qurýǵa nazar aýdarylǵanyn atap ótti.

«Biz 30 mlrd dollar jumsap, Qazaqstan boıynsha avtomobıl joldarynyń jelisin saldyq. Endi ishki jergilikti joldardyń qurylysyna ekpin qoıyp otyrmyz», - dedi Tuńǵysh Prezıdent.

Munymen qosa, Nursultan Nazarbaev Qazaqstandaǵy aýqymdy egistikter álem elderin organıkalyq ónimdermen qamtamasyz etýge qaýqarly ekenin jetkizdi.

«Aýyl sharýashylyǵyna kapıtal salý óte jemisti nátıje beredi. Sondyqtan bul baǵytta tıisti jumystar atqarylýda», - dedi Elbasy.