Qazaqstan aýmaǵynyń teń jartysyn qar basyp jatyr
ASTANA. QazAqparat - Qazaqstan aýmaǵynyń teń jartysyn qar basyp jatyr. Bul týraly búgin Úkimettiń selektorlyq rejimdegi otyrysynda QR Energetıka mınıstri Qanat Bozymbaev aıtty, dep habarlaıdy QazAqparat.
«Jerdi qashyqtan zondtaý túsirilimi derekterine sáıkes 23 naýryz kúni respýblıkanyń qar basqan aýmaǵy 49 paıyzdy qurap otyr. Jambyl jáne Ońtústik Qazaqstan oblysynda qar basqan aýmaq 3 paıyz ǵana. Almaty oblysynda 16, Qyzylorda oblysynda 1 paıyzdy quraıdy. Sáıkesinshe Qazaqstannyń ońtústik óńirindegi ózenderge erigen qar sýynyń túsý qaýpi tómen», - dedi mınıstr.
Onyń aıtýynsha, Qazaqstannyń ońtústigindegi transshekaralyq ózenderdiń sý deńgeıi Qyrǵyzstan men Ózbekstan respýblıkalarynda ornalasqan sý qoımalarynyń sý sharýashylyǵy rejimine baılanysty aıqyndalady.
«Qyzylorda oblysynda Syrdarııa ózeninde muz qursaýynyń buzylýy protsesi jalǵasýda. Bul jaǵdaı ózen arnasynda muz keptelisteri men jaıylym ýchaskelerin sý basý qaýpine ákelýi múmkin. Ońtústik Qazaqstan, Jambyl, Almaty oblystarynyń taý ózenderinde sý tasýy qatty jańbyr-shashyn men topyraq ylǵaldylyǵyna baılanysty qalyptasady», - dedi Qanat Bozymbaev.
Mınıstrdiń dereginshe, Qaraǵandy oblysyndaǵy Nura jáne Sherýbaı-Nura ózenderindegi ylǵal kólemi 70 paıyzǵa qysqarǵan. Aqmola oblysynda Astana sý qoımasyna deıingi Esil ózeniniń ylǵal kólemi 40, Aqtóbe oblysynda 10, Atyraý oblysynda 100 paıyzǵa ylǵaldylyq kemip otyr. Al Batys Qazaqstan, Qostanaı oblystarynda ylǵaldylyq kerisinshe 30 paıyzǵa ulǵaıǵan.
«Qaraǵandy oblysyndaǵy ózenderde kóktemgi sý tasý protsesi bastaldy. Sarysý, Sherýbaı-Nura ózenderindegi sý deńgeıiniń joǵarylaýy 0,9-0,9 metrdi quraıdy. Nura ózeninde sý deńgeıi Samarqand sý qoımasyna deıin 1,7-3,5 metrge, Taldy ózeninde qalypty belgilerge jetti. Osyǵan oraı 24 naýryzda aptalyq gıdrologııalyq boljamda Samarqand sý qoımasyna Nura ózeni arqyly keletin sý kólemi 23 naýryzdan 30 naýryzǵa deıin 91,151 mln tekshe metrge deıin ulǵaıýy múmkin», - dedi mınıstr.
