Qazaqstan aýmaǵynyń 70 paıyzyn shól basyp barady - Qorshaǵan ortany qorǵaý mınıstrligi
ASTANA. 29 sáýir. QazAqparat - Qazaqstan aýmaǵynyń 2/3 bóligin shól basyp barady. Bul týraly búgin Astanada "Qazaqstan Respýblıkasynda jerdiń shól basýyna qarsy kúres BUU Konventsııasynyń oryndalýy" atty dóńgelek ústelde QR Qorshaǵan ortany qorǵaý vıtse-mınıstri Bektas Muhamedjanov málim etti.
"Qazirgi tańda Qazaqstan aýmaǵynyń 2/3-in shól basqan jáne bul úderis údep keledi", - dedi vıtse-mınıstr. Onyń aıtýynsha, atalmysh ekologııalyq apatpen kúres jolynda Qazaqstan 1994 jyly BUU shólge aınalýmen kúresý jónindegi Konventsııasyna qol qoıdy jáne 1997 jyly ratıfıkatsııalady.
"Aıta ketken jón, tabıǵatty qorǵaý salasyndaǵy konventsııalardyń ishinde atalǵan konventsııa ekologııalyq problemalardy ǵana emes, sonymen qatar áleýmettik jáne ekonomıkalyq máselelerdi sheshýge yqpal etýge baǵyttalǵan. Halqynyń 43 paıyzy aýylda turatyn jáne onyń basym bóligi jer ıgerý arqyly nápaqasyn taýyp otyrǵan Qazaqstan úshin jerdiń degradatsııasy men shóleıttenýi ózekti túıtkilderdiń biri", - dep atap ótti B. Muhamedjanov.
Vıtse-mınıstrdiń aıtýynsha, Qazaqstanda jer resýrstaryn basqarý baǵytynda birqatar zańnamalyq aktiler qabyldanyp, birneshe joba jasaldy. Olardyń qatarynda Syrdarııa arnasyn basqarý, Aral teńiziniń soltústik bóligin saqtaý, el aýmaǵynda orman alqaptaryn keńeıtý, shóleıt jerlerdi basqarý, mal sharýashylyǵyna arnalǵan aýmaqtardy baqylaý jobalary bar.
Mınıstrliktiń málimetinshe, keleshekte Shól basýmen kúres ulttyq ortalyǵyn qurý josparlanýda. Ortalyq halyqaralyq jáne úkimettik emes uıymdardy, jergilikti qaýymdastyq pen bıznes ókilderin ortaq jobalarǵa tartý kózdelgen.
