Qazaqstan aýmaǵynda jolda qalǵan 338 adam qutqaryldy
ASTANA. QazAqparat - QR ІІM TJ komıteti bólimsheleriniń, jergilik polıtsııa qyzmetiniń, jergilikti atqarýshy organdardyń, jol ári kommýnaldyq qyzmetteriniń kúshimen 22 qańtarda elimizdiń avtojoldarynan 338 adam, onyń ishinde 15 bala jylytylǵan oryndarǵa jetkizildi.
Bul týraly QR ІІM TJK resmı ókili Rýslan Imanqulov málim etti, dep habarlaıdy QazAqparat.
«Samara-Shymkent» jolynyń 1052 shaqyrymyndaǵy Aqtóbe oblysy Yrǵyz aýdany aýmaǵynda tehnıkalyq aqaýyna baılanysty turyp qalǵan avtobýstyń 53 jolaýshysy (4 bala bar) jylytý beketine jetkizildi. Jolaýshylar avtobýsy Shymkentten Ýfaǵa baǵyt alǵan. Jolaýshylardyń 47-si Ózbekstan azamaty, altaýy - reseılik. Al 3 júrgizýshi Qazaqstan azamattary.
Budan bólek, «Astana-Petropavl» avtojolynyń 54 shaqyrymynda, ıaǵnı Aqmola oblysy Shortandy aýdany aýmaǵynda jolda qalǵan avtobýstyń 41 jolaýshysy (2 bala bar) «Bozaıǵyr» eldi mekenine jetkizildi. «Petropavl-Saryaǵash» baǵytyndaǵy bul avtobýstyń jolaýshylary Ózbekstannyń azamattary jáne eki júrgizýshi Qazaqstan azamattary.
Aqmola oblysy Bulandy aýdanynda «Merke-Túmen» baǵytyndaǵy jolaýshylar avtobýsy tehnıkalyq aqaýlary saldarynan jolda toqtap qalǵan. Kóliktegi 57 adam Makınsk qalasyna jetkizildi. Jolaýshylardyń barlyǵy Tájikstan azamattary.
Al Tselınograd aýdany aýmaǵynda «Almaty-Ekaterınbýrg» jolynyń 1275 shaqyrymynda jolda qalǵan avtobýstyń 15 jolaýshysy, onyń ishinde 5 bala Semenov orta mektebine jetkizildi. Bul adamdardyń barlyǵy Qyrǵyzstan azamattary ekeni anyqtaldy. Avtobýs jóndelgennen keıin, qaıtadan jolǵa shyqty.
Býrabaı aýdanynda «Kókshetaý-Şýchınsk» jolynyń beketinen jergilikti polıtsııa qyzmetiniń súıemeldeýimen Kókshetaýǵa deıin 2 jolaýshylar avtobýsy jetkizildi. Jolaýshylar kólikteri «Saryaǵash-Ekaterınbýrg» baǵytynda júrgen. Salonda bolǵan Ózbekstannyń 50 azamatyna qajetti kómek kórsetildi.
Sonymen qatar «Astana-Omby» baǵdaryndaǵy avtobýsta bolǵan reseılik 20 adam Kókshetaýdaǵy qonaq úılerdiń birine ornalastyryldy.
Munymen qosa, Tselınograd aýdanynda «Almaty-Ekaterınbýrg» jolynyń 1 304 shaqyrymynda qalǵan úsh avtokóliktegi 13 adam jylytý oryndaryna jetkizildi.
Budan bólek, Qorǵaljyn aýdany aýmaǵyndaǵy jolda kólikteri turyp qalǵan 20 jolaýshynyń 11-i Qorǵaljyn eldi mekenindegi qonaq úıge, al qalǵan 9 adam sol jerdegi týystarynyń úılerine ornalastyryldy. Zardap shekkender joq.
