Qazaqstan aýmaǵynda túrik, ýkraın, nemis, bolgar, ázirbaıjan, lıtva, latvııa azamattary zańsyz júk tasymalymen aınalysqan
ASTANA. 25 shilde. QazAqparat - Kóliktik baqylaý komıteti bir apta ishinde 46 sheteldik tasymaldaýshyny ustady. Sheteldik tasymaldaýshylar kóliktik baqylaý organdarymen ruqsat berý júıesiniń talaptaryn buzýyna baılanysty ustaldy jáne jaýapkershilikke tartyldy.
Bul aqparatty QR Kólik jáne kommýnıkatsııa mınıstrliginiń baspasóz qyzmeti taratty.
«16 túrik, 14 ýkraındyq, 5 lıtvalyq, 4 germanııalyq, 3 bolgarııalyq, 3 ázirbaıjandyq, 1 latvııalyq tasymaldaýshy tıisti ruqsat qujatynsyz Qazaqstan aýmaǵy arqyly júk tasymaldaýmen aınalysqan. Atalǵan ruqsat qujatynyń sheteldik tasymaldaýshylarǵa Halyqaralyq kelisimderge sáıkes beriletindigin aıtyp ótý kerek. Árbir memleket seriktes - memleketke óziniń aýmaǵy arqyly júk alyp ótý úshin belgili mólsherde kvota bóledi. Osylaısha, tasymaldaýshy kompanııalar atalǵan kvotasyz nemese bólingen kvota sany taýsylǵan jaǵdaıda shet elderdiń aýmaǵy arqyly júk tasymaldaı almaıdy», - delingen habarlamada.
Kóliktik baqylaý komıteti tóraǵasynyń orynbasary Áset Asaýbaevtyń aıtýynsha, bul sharalardyń barlyǵy da otandyq júk tasymaldaýshylardy qoldaý maqsatynda qabyldanyp otyr. Basqasha aıtqanda, belgilengen kvota kóleminen tys júk tasymaldaýmen aınalysatyn sheteldik kompanııalar otandyq tasymaldaýshylardy tapsyrystan aıyrady degen sóz.
Mysaly, búgingi kúni Ýkraına Qazaqstanǵa óziniń aýmaǵy arqyly júk tasymaldaý úshin 6850 kvota bólgen. Dál osynsha ret ýkraındyq júk tasymaldaýshylar Qazaqstan terrıtorııasy arqyly júk tasymaldaı alady. Kelisim aıasynda Túrkııa men Qazaqstan arasynda tasymaldaýshylar jylyna 7000 reısti júzege asyra alady.
Shet eldiń quzyretti organdarymen (38 elmen) 2012 jylǵa jasasqan kelisimder nátıjesinde qazaqstandyq tarap búgingi kúni 126475 sheteldik ruqsat kvotasyn alǵan. Aıtyp ótý kerek, 2012 jyldyń 6 aıy ishinde kóliktik baqylaý beketterinde sheteldikter tarapynan jol berilgen 1372 buzýshylyq anyqtaldy.
