Qazaqstan aýmaǵynda terrorıstik materıaldardy taratýǵa ǵana emes, olardy ákelýge, shyǵarýǵa jáne ázirleýge tyıym salynady
ASTANA. QazAqparat - Búgin Parlament Májilisinde «Qazaqstan Respýblıkasynyń keıbir zańnamalyq aktilerine ekstremızmge jáne terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasy ekinshi oqylymda maquldandy. Májilis maquldaǵan qujat Parlament Senatyna joldanady.
«Ekinshi oqylymǵa ázirleý barysynda depýtattar alpystan astam túzetýler usyndy. Olardyń basym bóligi ekstremızm men terrorızmge qarsy kúres salasyndaǵy quqyqtyq bazany jetildirýge múmkindik beredi. Atap aıtqanda, memlekettik organdardyń osy saladaǵy qyzmetteri naqtylana túsedi. Máselen, terrorızmge qarsy ortalyqtyń jumysy kadrlyq baǵytta nyǵaıtylady», - dedi Májilis depýtaty Máýlen Áshimbaev.
Onyń aıtýynsha, zań jobasynda ekstremızm men terrorızmniń aldyn alý sharalary kúsheıtiledi. Bul rette depýtattar jańa quqyqtyq tetikti engizý máselesin pysyqtaǵan. «Elimizdiń aýmaǵynda terrorıstik jáne ekstremıstik materıaldardy taratýǵa ǵana emes, olardy ákelýge shyǵarýǵa nemese ázirleýge tyıym salý usynylyp otyr. Budan bólek, jer ýchaskelerin berý protsesin retteý, sondaı-aq ǵımarattardy ǵıbadat úıi etip qaıta ózgertýmen baılanysty sharalar naqtylanady. Atap aıtqanda, ǵımarattardy ǵıbadat úıi etip beıindeý úshin jer ýchaskeleriniń nysanaly maqsatyn ózgertý boıynsha túzetýler engizildi», - deıdi Máýlen Áshimbaev.
Sonymen qatar, zań jobasy boıynsha erekshe óndiristik negizde ekstremıstik nemese terrorıstik uıymdardy «sheteldik» nemese «halyqaralyq» degen sózderdi alyp tastaı otyryp, olardyń áreket etetin aýmaǵyna qaramastan taný týraly sheshim qabyldanyp otyr. Óıtkeni, búgingi kúni Qazaqstanda tirkelgen uıymdardy terrorıstik dep taný tek erekshe shaǵymdyq jaǵdaıda ǵana júzege asady. Al bul osyndaı uıymdarǵa qatysty sanattaǵy isterdiń sottarda qaralý merzimine áser etedi ári olardyń áreketteriniń aldyn alýǵa teris áser etedi. Osyǵan oraı, mundaı ister boıynsha sot sheshimderin jedel oryndaý sanatyna jatqyzý qarastyrylyp otyr.
Jalpy, zań jobasynyń negizgi maqsaty ekstremızm men terrorızmge qarsy is-qımyl salasyndaǵy qatynastardy retteıtin zańnamany jetildirý bolyp tabylady.
