Qazaqstan aýmaǵynda óziniń offshorlyq aımaǵy qurylsa ıgi - T. Ómirzaqov
ASTANA. QazAqparat - Qazaqstan aýmaǵynda óziniń offshorlyq aımaǵy qurylsa ıgi. Búgin Parlament Májilisiniń jalpy otyrysynda Ekonomıka jáne bıýdjettik josparlaý mınıstriniń atyna saýal joldaǵan depýtat Tursynbek Ómirzaqov osyndaı másele kóterdi.
Saýal barysynda Elbasy «kóleńkeli» bıznespen kúresýge qatysty naqty tapsyrmalar júktegenin aıtqan depýtat bul baǵyttaǵy atqarylyp jatqan sharalarǵa kóńil tolmaıtynyn, ańǵartty. Osyǵan oraı, Tursynbek Qazenuly mınıstrlik orta merzimdik kezeńge arnaıy baǵdarlama qabyldap, eń quryǵanda naqty bir nemese birneshe salada «kóleńkeli» aınalymdy tómendetýge kirisýi kerek.
«Eń aldymen konvertpen beriletin jalaqyny joıýǵa tıispiz. Bundaı jasyryn jalaqy salyqtan jaltartyp qana qoımaı, áleýmettik problemalarǵa da soqtyrady. Konvertten jalaqy ala otyryp, bizdiń azamattarymyz járdemaqy men zeınetaqydan qaǵyla túsedi», - deıdi Tursynbek Ómirzaqov.
Depýtat kótergen ekinshi másele - offshordan qazaqstandyq kapıtaldy shyǵarý. «Qazaqstannyń halyqaralyq ınvestıtsııalyq pozıtsııasyna kóz júgirtsek, elimizden Vırgın araldaryna 3,6 mlrd. dollar ınvestıtsııa salǵanbyz. Kıprge 1,9 mlrd. dollar salynǵan. Osyndaı eldermen jumys jasaýǵa tıispiz, salyqtyq aqparat almasýymyz kerek. Sosyn qazir Qazaqstanda kóptegen arnaıy ekonomıkalyq aımaqtar bar. Endeshe respýblıka aýmaǵynda ózimizdiń offshordy qurý týraly oılanǵanymyz da abzal», - deıdi T. Ómirzaqov.
Onyń aıtýynsha, kóptegen damyǵan elderde ózderiniń offshorlary bar. Kórshiles Reseıdiń ózi Qıyr Shyǵystan offshor aımaǵyn salǵysy keledi. «Al Eýrazııalyq ekonomıkalyq odaq aıasynda qurylýy múmkin mundaı erkin aımaqqa qazaqstandyq kapıtal aǵyny kedergisiz quıylyp ketý múmkin. Budan bólek, keleshekte offshorlar kapıtal aǵynyn tartýdyń negizgi quralyna aınalýy ǵajap emes», - deıdi depýtat.
