Qazaqstan aýmaǵynda mekendeıtin qar barystaryna at qoıylmaq
ALMATY. QazAqparat - Almaty taýlarynda mekendeıtin ár bir qar barysyna ID pasport beriledi, dep habarlaıdy QazAqparat tilshisi.
Bul týraly Almaty qalalyq máslıhatynyń depýtaty Erjan Erkinbaev Instagram jelisinde jazdy.
Onyń aıtýynsha, bul jumys Snow leopard foundation qorynyń atqaryp jatqan jumystarynyń jalǵasy bolmaq.
«Bizdiń qor óz jumysynyń belsendi fazasyna kóshti. Almaty taýynda brakonerlerdiń qýdalaýynan aman qalǵan, jaraqat alǵan barystardy ońaltatyn ortalyq sonymen qatar, olardy baǵyp-ósirip jabaıy tabıǵat aıasyna jiberetin pıtomnık salynady. Sosyn janýarlardyń sanaǵyn júrgizetin bolamyz. Búgin foto-tuzaq degen qurylǵymen tanysyp jatyrmyz. Sonyń arqasynda barystardyń árqaısysyna ID pasport berilip, at qoıylady. Ár fototuzaqta Sim-karta bolady, sol arqyly sýret dereý ofıske jodanyp otyrady»,- dedi Erjan Erkinbaev.
Ol Qazaqstanda 100-ge jýyq barys mekendeıtinin aıtty.
«Al ornatylǵan foto-tuzaqtardyń sany 15-ke jetpeıdi. Jazǵa deıin Zoologııa ınstıtýty men Іle Alataýy parkimen birlesip janýarlardyń sanaǵyn júrgizýge baǵyttalǵan arnaıy ádisteme men qajetti quraldardy alatyn bolamyz», - dedi ol.
Eske sala keteıik, buǵan deıin Almaty taýlarynda qar barysynyń zoobaǵy ashylatyndyǵy týraly habarlaǵan bolatynbyz.
