Qazaqstan aýmaǵynda mal azyǵyn daıyndaý kólemi qandaı

NUR-SULTAN. QazAqparat – Elimizde 19,7 mln tonna shóp nemese 83 paıyzy daıyndaldy. Bul týraly Úkimet otyrysynda QR Aýyl sharýashylyǵy mınıstriniń mindetin atqarýshy Erbol Qarashókeev aıtty, dep habarlaıdy QazAqparat tilshisi.

«Maldyń qystan oıdaǵydaı shyǵýy úshin oblystardyń ákimdikterimen birlesip, azyq daıyndaý josparlary belgilendi. Mysaly, shóp daıyndaý jospary zapastaǵylardy eskere otyryp, 23,7 mln tonnany quraıdy. Іs júzinde 19,7 mln tonna shóp nemese 83% daıyndaldy. Almaty, Jambyl jáne Qostanaı oblystarynda jospardyń shamamen 90%-y kóleminde shóp daıyndaldy», - dedi E. Qarashókeev.

Onyń aıtýynsha, uıymdastyrylǵan sharýashylyqtar 989 myń tonna pishendeme ázirledi, bul jospardyń 62%-yn quraıdy. Sondaı-aq súrlem daıyndalyp jatyr, jospar 2 mln tonnadan asady. 4,8 mln tonna saban jáne 6 mln tonna qunarly azyq daıyndaý boıynsha josparlar aıqyndaldy.

«Soltústik óńirler úshin pishen boıynsha ǵana emes, basqa óńirlerde shóp jetispegen jaǵdaıda, saban daıyndaý boıynsha da josparlar ulǵaıtyldy», - dedi Erbol Qarashókeev .

Budan buryn habarlanǵandaı, mınıstrlik atalǵan óńirlerdi qoldaýǵa qansha qarajat bólingenin baıandady.

Óńirler arasynda azyq-túlikti belgilengen baǵamen ózara jetkizý jáne zardap shekken sharýashylyqtarǵa shóp shabý úshin 130 myń gektarǵa jýyq shabyndyq jer bólý týraly sharttar men memorandýmdar jasaldy.