Qazaqstan aýmaǵynda bir aptada 3 myńnan astam qylmys jasaldy
NUR-SULTAN. QazAqparat – Bir aptanyń ishinde elimizdiń aýmaǵynda 3 myńnan astam qylmys jasaldy. Bul týraly QR Іshki ister mınıstrliginiń resmı ókili Nurdildá Oraz málim etti, dep habarlaıdy QazAqparat tilshisi.
«Bir apta ishinde 3457 qylmys jasaldy, onyń 2322 táýlik ishinde ashyldy. Polıtsııa qyzmetkerleri «izin sýytpaı» 8 kisi óltirýdi, 5 ólimge ákep soqqan densaýlyqqa qasaqana aýyr zııan keltirýdi, 3 qaraqshylyq, 29 tonaý jáne 541 bóten múlikti urlaý qylmystaryn ashty», - dedi resmı ókil mınıstrliktiń baspasóz qyzmeti alańynda ótken brıfıng barysynda.
Sonymen qatar ol Іshki ister mınıstriniń atyna polıtseılerge alǵys hattar kelip túsip jatqanyn aıtty.
«Aqmola oblysynyń turǵyny Aqkól aýdanynyń polıtsııa ınspektorlary Evgenıı Makagon men Almas Balmuhanovqa ómirlik qıyn jaǵdaıda kómek kórsetkeni úshin alǵys bildiredi. Aqkóldik turǵynǵa jáne onyń qyzyna joǵalǵan jeke qujattaryn rásimdeýge kómek kórsetilýi nátıjesinde áıeldiń qyzy ýaqtyly medıtsınalyq kómek aldy. Kelesi bir alǵys hatta almatylyq zeınetker aǵa jedel ýákil Aıaýjan Jaıbergenge aýyr qylmysty jedel ashýdaǵy kásibıligi úshin alǵys bildiredi», - dedi ol.
