Qazaqstan aýmaǵynda aıazdy kún raıy kútilýde - 21 qarashaǵa arnalǵan aýa raıy boljamy
ASTANA. 20 qarasha. QazAqparat - Qazaqstannyń basym kópshilik aýmaǵy 21 qarasha kúni antıtsıklonnyń yqpalynda bolady, jaýyn-shashynsyz aıazdy kún raıy kútiledi.
Respýblıkanyń tek soltústik, ońtústik-shyǵys jáne shyǵys aýdandary arqyly atmosferalyq aǵymdardyń ótýine baılanysty burqasyn, kóktaıǵaq, jeldiń kúsheıýi kútiledi, dep habarlaıdy TJM-niń baspasóz qyzmeti Qazgıdrometke silteme jasaı otyryp.
Jambyl oblysynyń birqatar aımaqtarynda tuman túsedi, kóktaıǵaq bolady, jeldiń 15-20 m/s deıin kúsheıýi yqtımal.
Aqmola oblysynda keıbir jerlerde burqasyn, kóktaıǵaq, jeldiń jyldamdyǵy 15-20 m/s deıin bolyp, túnde jáne tańerteń keı jerlerde tuman túsýi múmkin.
Soltústik Qazaqstan, Shyǵys Qazaqstan oblystarynda, kúndiz Qostanaı, Pavlodar oblystarynyń keıbir jerlerinde 15-20 m/s jyldamdyqpen jel soǵyp, burqasyn bolýy yqtımal.
Almaty oblysynda, túnde Ońtústik Qazaqstan, Atyraý oblystarynyń birqatar aımaqtarynda tuman túsedi.
Qyzylorda jáne Mańǵystaý oblystarynyń keıbir jerlerinde 15-20 m/s jyldamdyqpen jel soǵýy yqtımal.
Aldaǵy táýlikte Qazaqstannyń soltústik, soltústik-shyǵys, ortalyq jáne shyǵysyndaǵy sýlarda muz qatady, osyǵan baılanysty respýblıka shyǵysynyń jekelegen ózenderinde sý deńgeıi kóterilýi múmkin. Respýblıkanyń ońtústik jáne ońtústik-shyǵysyndaǵy kóptegen ózenderde sý betiniń odan ári salqyndaýy baıqalady, Almaty oblysynyń jekelegen ózenderinde muz qatady. Syrdarııa ózeniniń Ońtústik Qazaqstan jáne Qyzylorda oblysynyń ońtústigindegi bóliginde Shardara sý qoımasynan sý tolqynynyń taralýy esebinen sýdyń kóbeıýi yqtımal.
