Qazaqstan aýmaǵynan kúnbaǵys maıyn áketýge shekteý qoıyldy

NUR-SULTAN. QazAqparat - Memlekettik kirister komıteti Aýyl sharýashylyǵy mınıstriniń 17 maýsymdaǵy buıryǵymen el aýmaǵynan kúnbaǵys maıyn áketýge sandyq shekteýler engizilgenin málimdedi, dep habarlaıdy QazAqparat.

Shekteý sharalary bıylǵy 18 maýsym men 31 tamyz aralyǵyn qamtıdy.

«Kúnbaǵys maıyn Qazaqstan aýmaǵynan áketýge sandyq shekteýler baǵalardy turaqtandyrý jáne syrtqy naryqtarda joǵary suranysqa baılanysty naryqta tapshylyqtyń týyndaýyn boldyrmaý maqsatynda engizildi. K únbaǵys maıyn el aýmaǵynan áketý Agroónerkásiptik keshendegi memlekettik ınspektsııa komıtetiniń aýmaqtyq bólimsheleri beretin fıtosanıtarııalyq sertıfıkat bolǵan kezde ǵana júzege asyrylady», - dep jazdy vedomstvodan.

Aıta keteıik, kúnbaǵys maıyn áketýge engizilgen sandyq shekteýler 2021 jylǵy 15 jeltoqsannan bastap 2022 jylǵy 1 maýsymǵa deıin qoldanylǵan.