Qazaqstan aýmaǵymen Reseı, Belarýs áskerı tehnıkalary qozǵalady: Mınıstrlik úndeýi

ASTANA. QazAqparat – Qazaqstandaǵy oqý-jattyǵýǵa kelgen Reseı jáne Belarýs Respýblıkalarynyń áskerı eshelondary 8-15 qazan aralyǵynda óz elderine qaıtady. QR Qorǵanys mınıstrligi osyǵan oraı halyqqa úndeý jasady, dep habarlaıdy QazAqparat.

Qazaqstannyń qorǵanys vedomstvosy bıylǵy 26 qyrkúıek – 8 qazan aralyǵynda Jambyl jáne Almaty oblystarynda Ujymdyq qaýipsizdik týraly shart uıymynyń Jedel áreket etý ujymdyq kúshteriniń qatysýymen «Ózara is-qımyl-2022», «Іzdeý-2022», «Eshelon-2022» oqý-jattyǵýlary ótkenin eske saldy.

«Atalǵan oqý-jattyǵýlar aıaqtalǵannan keıin, 8-15 qazan aralyǵynda Qazaqstan aýmaǵy boıynsha áskerı eshelondar turaqty ornalasqan pýnkterine qaıtady.
Reseı Federatsııasy men Belarýs Respýblıkasy Qarýly kúshteriniń áskerı kontıngentteri elimizdiń aýmaǵy boıynsha «Qazaqstan temir joly« UK» AQ-men buryn kelisilgen eshelondar qozǵalysynyń kestesi boıynsha eki baǵytta: ońtústikten shyǵysqa jáne batysqa qaraı qozǵalady.
Budan basqa, Qazaqstan Qarýly kúshteriniń quramalary men bólimderi el aýmaǵy boıynsha temirjol kóligimen jáne áskerı tehnıkamen ótedi.
Osyǵan baılanysty azamattardan áskerı tehnıkanyń qozǵalysy týraly jalǵan habarlamalar men beınematerıaldarǵa nazar aýdarmaı, tek resmı aqparat kózderine senýin suraımyz», - delingen mınıstrlik málimetinde.