Qazaqstan aýmaǵymen qaýipti júk tasymaldaǵandar jaýapqa tartyldy
«1 qazan - 1 qarasha aralyǵynda QR Investıtsııalar jáne damý mınıstrliginiń qyzmetkerleri «Abaılańyz, qaýipti júk!» aktsııasyn ótkizdi. Bul shara jyl saıyn ótkizilip turady jáne qaýipti júk tasymaldaıtyn avtokólik quraldaryna baqylaýdy kúsheıtýge baǵyttalǵan. Bir aı merzim ishinde elimizdiń aýmaǵynda qaýipti júgi bar 1018 avtokólik quraly tekserildi. Atap aıtqanda, júkti tasymaldaý sharttary, qajetti qujattar, kólik quralynyń tehnıkalyq jaǵdaıy, júrgizýshilerdiń eńbek jáne tynyǵý rejimin ustanýy tekseristen ótkizildi», - dep atap ótilgen QR IDM baspasóz qyzmetiniń málimetinde.
Belgili bolǵandaı, tekserilgen avtokólik quraldarynyń 415-inde zań buzýshylyqtar anyqtalǵan. Olarǵa 22,5 mln teńge aıyppul salyndy. Avtojolmen júrip ótý alymy 2,7 mln teńgeni qurady. Zań buzýshylyqtardyń 377-sin qazaqstandyq tasymaldaýshylar jasasa, 38-si shetel tasymaldaýshylaryna tıesili boldy.
Aıta keteıik, 2016 jyldyń sáıkes kezeńinde ótken aktsııada tekserilgen 1203 avtokólik quralynyń 221-inen zań buzýshylyq anyqtalǵan. Al odan bir jyl buryn 1220 kóliktiń 169-ynda zań buzýshylyq bolǵan. Nátıjesinde, 2016 jyly jazylǵan aıyppuldar somasy 12,1 mln teńgeni qurady.
Eske salsaq, júk tasymaldaý (saqtaý, artý, túsirý) kezinde jarylysqa, órtke, ǵımarattar men qurylystardyń zaqymdanýyna sebep bolatyn, sonymen qatar adamdardyń, janýarlardyń ólimine, jaraqat alýyna nemese syrqattanýyna ákep soqtyratyn, qorshaǵan ortaǵa zııan keltiretin kez kelgen materıaldar men qaldyqtar qaýipti júkterge jatady.
