Qazaqstan aýmaǵy shóleıttenip bara jatqan joq - Ábishev

ASTANA. QazAqparat - Qazaqstan aýmaǵy shóleıttenip bara jatqan joq. Bul týraly búgin Ortalyq kommýnıkatsııalar qyzmetindegi brıfıngte QR Aýyl sharýashylyǵy mınıstrligi Sý resýrstary komıtetiniń tóraǵasy Islam Ábishev málim etti, dep habarlaıdy QazAqparat.

«Qumdy aýmaqtardyń ulǵaıýyna qatysty aıtar bolsa, óz basym kóptegen sarapshylarǵa senbeımin. Nelikten? Sebebi Ertiske qatysty óte kóp saraptamalyq qorytyndy bar. Men saraptamalyq qorytyndylary zerdelep, sarapshylarǵa habarlasqan da edim. Olardan: «Siz muny qaıdan jáne qandaı negizge súıenip aldyńyz?» desem, olar qandaı da bir gazette nemese jýrnalda jarııa etilgen basqa sarapshynyń málimetterine silteme jasaıdy. Odan ary qazbalap, aqyry sońynda derekkózin taba almadyq», - dedi ol BAQ ókilderiniń saýalyna oraı.

Onyń aıtýynsha, Qazaqstan jeri qurǵaqshylyqqa ushyrap, shóleıttenip bara jatyr dep dabyl qaǵattyn sarapshylardyń birde-biri shynaıy jaǵdaıdy bilmeıdi.

«Bizde, Qazgıdromette 140 jyl boıǵy Ertis ózenine baqylaý bar. Atalǵan sarapshylardyń birde-biri ony kórmegen. Al biraq, olar bir-birinen alyp qorytyndy jasaıdy. Shóleıttenýdiń ulǵaıyp bara jatýyna qatysty aıtar bolsam, buǵan da men sene bermeımin», - dedi Ábishev.