Qazaqstan aýmaǵy arqyly ruqsat qujatynsyz júrgen sheteldik júrgizýshilerge jaýapkershilik kúsheıtildi
ASTANA. 4 shilde. QazAqparat - «Qazaqstan Respýblıkasynyń keıbir zańnamalyq aktilerine kólik máselesi jóninde tolyqtyrýlar men ózgertýler engizý týraly» Qazaqstan Respýblıkasynyń zańnamasyna sáıkes Qazaqstan Respýblıkasynyń aýmaǵy arqyly arnaıy ruqsat qujatynsyz avtomobıl kóligimen halyqaralyq tasymaldy júzege asyrǵan sheteldik tasymaldaýshylar men sheteldik zańdy tulǵalarǵa salynatyn aıyppul kólemi ulǵaıtylady. Bul týraly QR KKM baspasóz qyzmetinen habarlandy.
Endigi jerde avtokólik quraldarynyń júrgizýshilerine salynatyn aıyppul kólemi 25 AEK, al zańdy tulǵalarǵa salynatyn aıyppul kólemi -500 aılyq eseptik kórsetkishti quramaq. Sáıkes ózgertýler «Ákimshilik quqyqbuzýshylyq jónindegi» Qazaqstan Respýblıkasynyń Kodeksine engizilip otyr ( bap 447-2). Buryn aıyppul kólemi 10-nan 25 AEK quraǵan edi.
Atalǵan normany engizý barysynda álemdik tájirıbe eskerildi. Mysaly, Polsha men Vengrııada arnaıy ruqsat qujatynsyz avtomobıl kóligimen halyqaralyq tasymaldy júzege asyrǵany úshin salynatyn aıyppul kólemi 500 myń teńgege, al Reseı men Frantsııada 2 mıllıon teńgege deıin.
2012 jyly kóliktik baqylaý organdary 972 sheteldik tasymaldaýshynyń kólik zańnamasyn buzǵanyn anyqtasasa, 2013 jyldyń bes aıy ishinde atalǵan zańnamany buzýshy sheteldik tasymaldaýshylardyń qatary 431 qurap otyr.
