Qazaqstan aýmaǵyndaǵy tehnogendi-mıneraldyq qaldyqtyń massasy 55 mlrd tonna boldy

ASTANA. KAZINFORM — Eldegi tehnogendi-mıneraldyq qaldyqtarǵa ınventarızatsııa júrgiziledi. Bul týraly Úkimet otyrysynda Ónerkásip jáne qurylys mınıstri Ersaıyn naǵaspaev málim etti.

— Qazaqstanda 1 700-den astam tehnogendi-mıneraldyq qaldyqtar tirkelgen, olardyń jalpy massasy 55 mlrd tonna bolady. Olardyń negizgi bóligi Pavlodar, Qaraǵandy jáne Qostanaı oblystarynda ornalasqan jáne 67%-dan astamy bólý balansyn júrgizýdi talap etedi. Búgingi tańda Sırek metaldar jáne sırek jer metaldary salasyn damytýdyń keshendi jospary aıasynda tehnogendik-mıneraldyq qaldyqtardy ınventarızatsııalaý jumystary bastaldy. Osy jumystar qaldyqtardy baǵalaýǵa, óńdeýge jáne ekologııalyq jobalarǵa ınvestıtsııa tartýǵa múmkindik beredi, — dedi Ersaıyn Naǵaspaev.

Onyń aıtýynsha, atalǵan 55 mlrd tonna qaldyqtyń 11%-y ǵana óńdeledi.

— Al damyǵan elderde bul kórsetkish 70-80%-ǵa jetedi. Qazirdiń ózinde mys, altyn, temir jáne basqa da shıkizatty óndirý kezindegi qaldyqtar qaıta óńdelip jatyr. Mysaly, Koýnrad kompanııasy óz ken ornynyń tehnogendik qaldyqtaryn paıdalanyp, jylyna 12 myń tonna mys óndiredi — bul elimizdiń búkil mys ónerkásibiniń shamamen 3%-yn quraıdy.
Sońǵy eki jylda qaldyqtardy qaıta óńdeýge arnalǵan jalpy somasy 47,8 mıllıard teńge bolatyn 3 joba iske qosyldy. — Aldaǵy 2 jylda quny 37,3 mıllıard teńge bolatyn 4 joba iske asyrylady, — dedi mınıstr.

Buǵan deıin elimizde karbondy polıgondar qurylatynyn jazǵan edik.