Qazaqstan aýmaǵyndaǵy ortasha kópjyldyq ózen aǵyny 12,5 sharshy shaqyrymǵa azaıǵan
ASTANA. KAZINORM – Qazaqstan aýmaǵyndaǵy ortasha kópjyldyq ózen aǵyny 12,5 sharshy shaqyrymǵa azaıǵan. Bul týraly búgin Úkimet otyrysynda Sý resýrstary jáne ırrıgatsııa mınıstri Nurjan Nurjigitov aıtty.
«Geografııalyq erekshelikterine baılanysty Qazaqstannyń 8 sý sharýashylyǵy basseıniniń jeteýi transshekaralyq sanalady. Sonyń saldarynan Qazaqstan negizinen kórshi elderdiń sý sharýashylyǵy saıasatyna táýeldi. Osyǵan baılanysty Aral-Syrdarııa, Jaıyq-Kaspıı, Shý-Talas, Balqash-Alakól sý sharýashylyǵy basseınderi, Tobyl-Torǵaı jáne Ertis sý sharýashylyǵy basseınderi neǵurlym osal bolyp otyr. Geografııa jáne sý qaýipsizdigi ınstıtýtynyń derekterine sáıkes, 1960 jylmen salystyrǵanda Qazaqstan aýmaǵyndaǵy ortasha kópjyldyq ózen aǵyny 12,5 sharshy shaqyrymǵa azaıdy. Onyń ishinde jalpy kólem qysqarýynyń 9 sharshy shaqyrymy nemese 72 paıyzy jergilikti ózenderdiń úlesine, al transshekaralyq ózenderdiń úlesine 3,5 sharshy shaqyrymy nemese 28 paıyzy keledi», - dedi Nurjan Nurjigitov.
Osyǵan baılanysty mınıstr transshekaralyq aǵyndy azaıtýdyń yqtımal úrdisin eskere otyryp, 2030 jylǵa deıin transshekaralyq yntymaqtastyqty damytý sý qatynastary salasyndaǵy memlekettik saıasattyń negizgi aspektileriniń birine aınalýy tıistigin basa aıtty.
«Transshekaralyq yntymaqtastyqty odan ári damytý shekaralas memlekettermen transshekaralyq sý aǵyndaryn birlesip paıdalaný, qorǵaý týraly jańa ekijaqty jáne kópjaqty sharttyq bazany qurýdy jáne qoldanystaǵy sharttaryn jetildirýdi talap etedi», - dedi ol.
