Qazaqstan aýmaǵynda onlaın kazıno qyzmetin júzege asyratyn uıymdardyń tizimi jaryq kórdi
Qarjylyq monıtorıng agenttigi Qazaqstan aýmaǵynda onlaın kazıno qyzmetin júzege asyratyn uıymdardyń tizimin jarııalady, dep habarlaıdy Kazinform.
Atalǵan tizim Memleket basshysynyń zańsyz qumar oıyndardy ótkizýdi shekteý týraly tapsyrmasyn oryndaý aıasynda Týrızm jáne sport mınıstrligimen birlesip quryldy.
"Tizim qarjylyq monıtorıng sýbektileriniń zańsyz oıyn bıznesine qarsy is-qımyl sheńberinde jáne óz qyzmetinde paıdalanýy úshin QMA portalynda ornalastyrylǵan.
Ol zańsyz oıyn bıznesin júzege asyrý kezinde qarjy uıymdarynyń ónimderi men qyzmetterin paıdalaný deńgeıin tómendetýge baǵyttalǵan.
Oıynǵa táýeldilik adam taǵdyryn buzatyn qaýipti qubylysqa aınalady", - dep jazdy vedomstvodan.
Mamandardyń túsindirýinshe, bul problema otbasylyq, turmystyq zorlyq-zombylyqtyń týyndaýyna jáne basqa da qylmystyq quqyq buzýshylyqtar jasaýǵa alǵysharttar týǵyzady.
2019-2022 jyldar aralyǵynda 73 jasyryn kazıno joıylyp, 2280 oıyn termınaly tárkilengepn.
Aǵymdaǵy jyldyń basynan beri agenttik qyzmetkerleri 19 zańsyz oıyn mekemesin jáne 111 oıyn termınalyn anyqtady.
"Qabyldanǵan aldyn alý sharalarynyń arqasynda sońǵy 5 jylda tirkelgen ister sanynyń 5,5 esege tómendeýi baıqalady.
Sonymen qatar, búgingi kúni agenttik zańsyz oıyn qyzmeti (onlaın kazıno) belgileri bar áleýmettik jelilerdegi saıttar men akkaýnttarǵa 3 myńnan astam siltemelerin buǵattaǵan", - delingen habarlamada.
QMA azamattardyń quqyqtaryn qorǵaý jáne olardy zańsyz qumar oıyndarǵa táýeldilikten saqtaý jónindegi belsendi jumysty jalǵastyrýda.
