Qazaqstan aýmaǵynda mıgranttardy ornalastyrý týraly aqparat shyndyqqa sáıkes kelmeıdi — SІM
ASTANA. KAZINFORM — Syrtqy ister mınıstrligi Qazaqstan aýmaǵynda úshinshi elder mıgranttaryn ornalastyrý máselesi boıynsha Eýropalyq Odaqpen kelissózder júrgizildi degen aqparatty resmı túrde joqqa shyǵardy. Bul týraly QR Syrtqy ister mınıstrliginiń resmı ókili Erlan Jetibaev málim etti.
Resmı ókildiń aıtýynsha, Qazaqstan men Eýropalyq Odaq arasynda nemese oǵan múshe memlekettermen Qazaqstan aýmaǵynda Qazaqstan Respýblıkasynyń azamattary emes, sondaı-aq eýropalyq elderden qaıtarylýǵa nemese deportatsııalanýǵa jatatyn adamdardy qabyldaý, ornalastyrý, ustaý nemese tranzıttik ótkizý ortalyqtaryn qurý máselesi boıynsha eshqandaı kelissózder júrgizilmegen.
Sondaı-aq vedomstvo ókili Qazaqstan azamattary úshin vızalyq rejımdi jeńildetý máselesi men readmıssııa máselesi derbes quqyqtyq sıpatqa ıe ekenin atap ótti.
— Vızalyq rejımdi jeńildetý jónindegi yqtımal talqylaýlar Qazaqstan aýmaǵynda ózge memleket azamattaryn ornalastyrý jóninde qandaı da bir mindettemeler qabyldaýǵa negiz bola almaıdy, — dep tolyqtyrdy Erlan Jetibaev.
Buǵan deıin vızalyq talaptardy jeńildetý jónindegi kelissózder aıaqtalǵanyn jazǵanbyz.
