Qazaqstan aýmaǵynda GÝLAG júıesiniń 11 lageri ornalasty — Prezıdent
ASTANA. KAZINFORM – Bul týraly Prezıdent Saıası qýǵyn-súrgin jáne asharshylyq qurbandaryn eske alýǵa arnalǵan is-sharada aıtty.
— Biz jyl saıyn 31 mamyrda Saıası qýǵyn-súrgin jáne asharshylyq qurbandaryn eske alamyz. Zulmat zamanda qaza bolǵan jandardyń rýhyna taǵzym etemiz.
Ótken ǵasyrda Keńes Odaǵyna qarasty kóptegen halyq talaı qıyndyqty bastan ótkerdi. Sonyń ishinde qazaq eli de zobalań jyldardyń taýqymetin tartty. Kúshpen ujymdastyrý naýqany kezinde mal-múlkinen aıyryldy. Jurtymyz alapat ashtyqtan qynadaı qyryldy, kóp adam jan saýǵalap, shetel asyp ketýge májbúr boldy.
Stalındik repressııa kezinde ultymyzdyń zııalylary, bilimdi, kózi ashyq azamattar jappaı qýdalandy. Myńdaǵan adam halyq jaýy atanyp, aıaýsyz azaptaldy, sotsyz atyldy. Ultymyz az ǵana ýaqyt ishinde Álıhan Bókeıhanov, Ahmet Baıtursynov, Sáken Seıfýllın, Іlııas Jansúgirov sııaqty myńdaǵan eń asyl perzentterinen aıyryldy, — dedi Prezıdent.
Memleket basshysy saıası qýǵyn-súrgin — tek qazaq halqynyń basyna túsken zobalań emes ekenin atap ótti.
— Qazaqstan aýmaǵynda GÝLAG júıesiniń 11 lageri ornalasty. «ALJIR» de — dál sondaı qasiretti jerdiń biri. Munda jazyqsyz jala jabylǵan 8 myńǵa jýyq áıel qamaýda otyryp shyqqan. Olardyń arasynda Turar Rysqulov, Sultanbek Qojanov, Temirbek Júrgenov, Beıimbet Maılın, Sanjar Asfendııarov syndy áıgili tulǵalardyń jubaılary bar. ALJIR azabyn kórgen jandardyń urpaqtary qazir ortamyzda otyr.
Saıası qýǵyn-súrgin — tek qazaq halqynyń basyna túsken zobalań emes. Mysaly, ALJIR-de alpystan astam etnos ókilderi qamaýda boldy. Sondyqtan sol qasiretti dáýirdiń qurbany bolǵan, zardabyn tartqan jurttyń bári osy náýbetterden sabaq alýy kerek. Mundaı kesapat eshqashan qaıtalanbaýǵa tıis. Al qazirgi tarıhı zamanda bul tek ózimizge ǵana baılanysty. Ult jylnamasyndaǵy qaraly kezeńderdi jadymyzda jańǵyrtýdyń túpki máni osynda, — dedi ol.
Aıta ketelik Prezıdent «ALJIR» saıası qýǵyn-súrgin jáne totalıtarızm qurbandarynyń memorıaldy-murajaı keshenine barǵan edi.