Qazaqstan aýmaǵynda 700-den astam bulaq bary anyqtaldy

ASTANA. KAZINFORM — «Qazgıdrogeologııa» ulttyq gıdrogeologııalyq qyzmeti Qazaqstan Respýblıkasy aýmaǵyndaǵy barlyq bulaqty túgendeý jumystaryn júrgizip jatyr. Aldyn ala derekterge sáıkes, búgingi tańda 711 áleýetti bulaq anyqtaldy. Bul týraly Sý resýrstary jáne ırrıgatsııa mınıstrligi málim etti.

Sonymen qatar qor jáne arhıv materıaldary negizinde el aýmaǵyndaǵy 2 772 bulaqty qamtıtyn karta jasalǵan. Aıta keteıik, bulaqtar sý resýrstary tapshylyǵy jaǵdaıynda qosymsha sý kózi retinde qarastyrylady.

Qazirgi ýaqytta Qazaqstanda aýyzsý jáne tehnıkalyq sýmen jabdyqtaý, sýarý jáne ózge de maqsattarǵa arnalǵan jerasty sýynyń 4 803 ken orny barlanǵan. Memlekettik balans boıynsha táýligine 43,2 mln tekshe metr kólemindegi paıdalaný qory tirkelgen. Onyń ishinde qazirgi tańda shamamen 1,5 mln tekshe metr nemese 3,6% ǵana paıdalanylyp otyr. Atap aıtqanda, sharýashylyq-aýyzsýǵa arnalǵan qor táýligine 21,2 mln tekshe metr. Óndiristik-tehnıkalyq qajettilikterge arnalǵan qor táýligine 2,4 mln tekshe metr, al sýarý maqsatynda táýligine 19,6 mln tekshe metr qarastyrylǵan.

– Qazaqstanda jerasty sýyna arnalǵan memlekettik monıtorıng jelisi jumys isteıdi, oǵan shamamen 4 myńǵa jýyq baqylaý uńǵymasy kiredi. Olar sý deńgeıin, temperatýrasyn jáne sapasyn baqylaýǵa múmkindik beredi. Gıdrogeologııa salasyn tsıfrlandyrý maqsatynda monıtorıngtik jáne paıdalaný uńǵymalaryn Sý resýrstarynyń ulttyq aqparattyq júıesine engizý jumystary júrgizilip jatyr, – dedi «Qazgıdrogeologııa» ulttyq gıdrogeologııalyq qyzmetiniń basqarma tóraǵasy Bolat Beknııaz.

Aıta keteıik. Qazaqstan sý qoımalaryndaǵy bos syıymdylyq 14,3 mlrd tekshe metrdi quraıdy.