Qazaqstan aýmaǵynan iri qara mal etin áketýge kvota engiziledi
ASTANA. KAZINFORM — Aýyl sharýashylyǵy mınıstrligi elimizdiń aýmaǵynan iri qara mal etin áketýge sandyq shekteý engizbek. Atalǵan vedomstvo basshysynyń osy máselege qatysty buıryq jobasy ashyq normatıvtik-aktiler portalynda jarııalandy.
Qujatta 6 aı merzimge iri qara mal etin (Eýrazııalyq ekonomıkalyq odaqtyń syrtqy ekonomıkalyq qyzmetiniń taýar nomenklatýrasynyń kodtary: 0201 — iri qara mal eti, jańa soıylǵan nemese salqyndatylǵan jáne 0202 — iri qara mal eti, muzdatylǵan) Qazaqstan Respýblıkasynyń aýmaǵynan úshinshi elderge jáne Eýrazııalyq ekonomıkalyq odaq elderine shyǵarýǵa 25 myń tonna kóleminde sandyq shekteýler (kvotalar) engizý kózdelgeni aıtylǵan.
Syrtqy saýda saıasaty jáne halyqaralyq ekonomıkalyq uıymdarǵa qatysý máseleleri jónindegi vedomstvoaralyq komıssııanyń 2026 jylǵy 26 maýsymdaǵy sheshimi negizinde engiziletin kvota otandyq et óńdeý kásiporyndarynyń shıkizat bazasyn qamtamasyz etý, aýyl sharýashylyǵy ónimderin óńdeý kólemderin ulǵaıtý, el ishinde qosylǵan qundy arttyrý, qosymsha jumys oryndaryn qurý, sondaı-aq ishki naryqty et ónimderimen qamtamasyz etý jáne baǵany turaqtandyrý maqsatyn kózdeıdi.
Buǵan deıin elimizde 2030 jylǵa deıin iri qara mal sany 12 mıllıon basqa jetýi múmkin ekenin jazǵan edik.
