Qazaqstan aýmaǵynan 8 halyqaralyq kólik dálizi ótedi
ASTANA. KAZINFORM – Qazaqstan Shyǵys pen Batys arasyndaǵy geosaıası jáne geoekonomıkalyq kópir bolyp, kólik pen energetıka salasyndaǵy jańa dálizderdiń negizgi torabyna aınaldy. Bul pikirdi QR Syrtqy ister mınıstriniń orynbasary Álibek Qýantyrov KGIR-2025 jahandyq ınvestıtsııalar jónindegi dóńgelek ústelde aıtty.
– Keıingi onjyldyqtar ishinde Qazaqstan kólik ınfraqurylymyn damytýǵa 35 mıllıard AQSh dollarynan astam ınvestıtsııa saldy. Nátıjesinde elimizdiń kólik júıesi 21 myń shaqyrym temirjoldy, 95 myń shaqyrym avtojoldy jáne Kaspıı teńizindegi eki port – Aqtaý men Quryqty qamtıdy, - dedi Á. Qýantyrov óz baıandamasynda.
Búginde elimizdiń aýmaǵy arqyly 8 halyqaralyq kólik dálizi ótedi. Bul Qazaqstandy «Bir beldeý – bir jol» bastamasynyń ortalyq habyna jáne Qytaı, Eýropalyq odaq jáne Ortalyq Azııa úshin mańyzdy kólik seriktesine aınaldyrady.
– Ásirese eń qarqyndy damyp kele jatqan baǵyt – Orta dáliz. Ol Qytaı men Qazaqstandy Kaspıı teńizi arqyly Ázerbaıjan, Grýzııa jáne Túrkııamen baılanystyrady. Qazir bul baǵytqa Armenııa da óz saýda joldary arqyly qosylyp otyr. Byltyr osy dáliz arqyly tranzıt kólemi 60%-ǵa ósip, 4-5 mıllıon tonna júkke jetti. Bul tek kólik dálizi ǵana emes, ekonomıkalyq turaqtylyqtyń, ártaraptanýdyń jáne jetkizý tizbekteriniń senimdi balama jolynyń aıǵaǵy. Sonymen birge, ol Shyǵys pen Batysty baılanystyratyn strategııalyq kópir qyzmetin atqarady, - dedi Syrtqy ister mınıstriniń orynbasary.
Spıkerdiń aıtýynsha, Qazaqstannyń aýyl sharýashylyǵyndaǵy áleýeti de zor. Elde 213 mıllıon gektar aýyl sharýashylyǵy jeri bar, onyń 178 mıllıon gektary – jaıylym. Bul kórsetkish boıynsha Qazaqstan álemde altynshy orynda jáne Ortalyq Azııadaǵy eń iri astyq óndirýshi el bolyp sanalady.
– Biz tek shıkizatty ǵana emes, qosylǵan quny joǵary ónimdi de eksporttaımyz. Aldaǵy jyldary sýarý júıelerin keńeıtý arqyly aýyl sharýashylyǵynyń ónimdiligin eki ese arttyrýdy jáne óńdelgen ónim úlesin 70%-ǵa deıin jetkizýdi maqsat etip otyrmyz. Zamanaýı, tıimdi jáne ornyqty kólik jelisi jetkizý tizbekteriniń turaqtylyǵyn qamtamasyz etedi, agroónerkásip keshenderine ınvestıtsııa tartady jáne jahandyq azyq-túlik qaýipsizdigine úles qosady, - dep tolyqtyrdy ol.
Aıta keteıik, Qazaqstanǵa tartylǵan tikeleı sheteldik ınvestıtsııa kólemi 10,1 mlrd dollardy qurady.