Qazaqstan aýmaǵyna 70 tonna bıdaıdy zańsyz ótkizbek bolǵandar ustaldy

PAVLODAR. KAZINFORM - Reseımen shekaradaǵy Sharbaqty stansasynda 70 tonna azyqtyq bıdaıdy el naryǵyna ótkizbek bolǵan júk alýshy ustaldy. Kináli tarap ákimshilik jaýapkershilikke tartylyp, 369 200 teńge aıyppul arqalady.

Agronerkásiptik keshendegi memlekettik ınspektsııa komıtetiniń Pavlodar oblystyq aýmaqtyq ınspektsııasynyń bólimshesi shekara qyzmeti mamandarymen birlese otyryp, júk aınalymyn turaqty baqylaý ústinde. 

- Inspektorlar shekarashylarmen birge Reseı Federatsııasynan QR aýmaǵyna aýyl sharýashylyǵy ónimin zańsyz tasymaldaq bolǵan júk alýshyny anyqtady. «JFOOD KAZAKHSTAN» JShS Sharbaqty stansasynda temir jol vagony arqyly 70 tonna azyqtyq bıdaıdy beri alyp ótpekshi bolǵan. Aýyl sharýashylyǵy mınıstriniń tamyz aıyndaǵy buıryǵyna sáıkes, syrttan bıdaı ákelýge tyıym salynǵan,-deıdi Pavlodar oblystyq aýmaqtyq ınspektsııasynyń basshysy Arman Shúıkenov.

Sharbaqty aýdandyq soty júk alýshyny «Ákimshilik quqyq buzýshylyq týraly» QR Kodeksiniń 400-baby 2-bóliminiń 2-tarmaqshasyna sáıkes ákimshilik jaýapkershilikke tartyp, 369 200 teńge kólemde aıyppul saldy.

Aýmaqtyq ınspektsııa tıelgen 70 tonna bıdaı ónimin temir jol vagonymen Reseı Federatsııasyndaǵy júk jóneltýshige qaıtardy.