Qazaqstan aýmaǵyn keń aýqymda geologııalyq zertteý baǵdarlamasy jalǵasady
ASTANA. KAZINFORM — Qazaqstanda zamanaýı ádisterdi qoldana otyryp, el aýmaǵyn geologııalyq turǵydan keń aýqymda zertteý baǵdarlamasy jalǵasady. Bul týraly Ónerkásip jáne qurylys mınıstri Ersaıyn Naǵaspaev elordada GEOSCIENCE&EXPLORATION CENTRAL ASIA-2026 halyqaralyq geologııalyq forýmynda aıtty.
— Aldaǵy úsh jylda 100 myń sharshy shaqyrym aýmaqta 1:50 000 masshtabtaǵy túsirilim baǵdarlamasy júrgiziledi. Bul jumystar qashyqtan zondtaý ádisterinen bastap aerogeofızıkalyq jáne geohımııalyq zertteýlerge deıingi zamanaýı tásilder kómegimen júrgiziledi. Sonymen birge, Shý-Sarysý jáne Soltústik Torǵaı sııaqty jetkilikti zerttelmegen munaı-gaz áleýeti bar shógindi alaptarda seısmıkalyq barlaý jumystaryn júrgizý josparlanyp otyr. Alynǵan nátıjeler keıin egjeı-tegjeıli izdeý jáne barlaý jumystaryn júrgizýge negiz bolady, — dedi Ersaıyn Naǵaspaev.
Sonymen birge, jer qoınaýyn paıdalaný protsesterin aýqymdy tsıfrlandyrý kózdelip otyr.
— Byltyr jer qoınaýyn paıdalanýdyń Biryńǵaı platformasy iske qosyldy. Ol ótinim berýden bastap lıtsenzııa berýge deıingi tolyq tsıfrlyq tsıkldi qamtamasyz etedi. Platformada 22 memlekettik qyzmet jumys isteıdi, elektrondyq aýktsıondar engizilgen jáne jazylym bonýsyn onlaın tóleýge arnalǵan «elektrondyq ámııan» servısi iske qosylǵan. Oǵan qosa, bıyl bastapqy geologııalyq aqparat tsıfrlandyrý jumystary aıaqtalady. Bul protsesterdi júıeli basqarýǵa múmkindik beredi, rásimderdiń ashyqtyǵyn arttyrady jáne ınvestorlar úshin qolaıly orta qalyptastyrady, — dedi sala mınıstri.
Úshinshiden, Ulttyq geologııalyq qyzmetke keńeıtilgen ókilettikter berildi. Atap aıtqanda, jer qoınaýyn memlekettik geologııalyq zertteýdi uıymdastyrý jáne júrgizý, memlekettik monıtorıngti júzege asyrý, biryńǵaı memlekettik kadastrdy júrgizý, geologııalyq ınfraqurylymdy damytý jáne salany nyǵaıtý men damytýǵa baǵyttalǵan ózge de mindetterdi iske asyrý quzyreti berildi.
— Aımaqtyq ózara is-qımyl máselesine de erekshe toqtalǵym keledi. Jer qoınaýyn barlaý, paıdalaný jáne qorǵaý jónindegi Úkimetaralyq keńes aıasyndaǵy yntymaqtastyqtyń mańyzy zor. Bul alań óńir memleketteri arasynda kelisilgen sheshimder qabyldaýǵa jáne tájirıbe almasýǵa tıimdi múmkindik beredi. Biz óńirdegi salanyń kelesi damý kezeńi myna baǵyttarǵa negizdelýi tıis dep sanaımyz: jer qoınaýyn geologııalyq zertteý tásilderin úılestirý; geologııalyq aqparat almasýdy damytý; shekaralas aýmaqtardy qosa alǵanda, perspektıvaly qurylymdardy birlesip zertteý; ózara úılesimdi tsıfrlyq geologııalyq platformalardy qalyptastyrý. Bul jerde halyqaralyq áriptestik pen jahandyq tehnologııalyq kompanııalardyń qatysýy mańyzdy ról atqara alady, — dedi Ersaıyn Naǵaspaev.
Mınıstrdiń aıtýynsha, Qazaqstan geologııalyq salada ózara tıimdi seriktestikti keńeıtýge jáne birlesken bastamalardy júzege asyrýǵa ashyq.
Buǵan deıin mınıstr jer qoınaýyn ıgerýdiń dástúrli modelin túbegeıli qaıta qaraýdy qajet etetin ýaqyt kelgenin aıtqan edi.
Aldaǵy 3 jylda geologııalyq barlaý jumystaryn qarjylandyrý 500 mln dollarǵa jetedi.
