Qazaqstan aýmaǵynan ózge elge qarsy dron ushyrylǵany jaıly aqparat jalǵan — SІM
ASTANA. KAZINFORM – Qazaqstan Respýblıkasy Syrtqy ister mınıstrligi el aýmaǵy Reseıdegi nysandarǵa shabýyl jasaǵan ushqyshsyz ushý apparattaryn ushyrý úshin paıdalanylýy múmkin degen aqparatqa qatysty túsinikteme berdi.
Vedomstvonyń málimetinshe, sońǵy kúnderi keıbir buqaralyq aqparat quraldarynda Qazaqstan aýmaǵyna qatysty arandatýshylyq sıpattaǵy málimdemeler taraǵan.
– Qazaqstan Respýblıkasynyń Syrtqy ister mınıstrligi atalǵan málimdemelerdiń shyndyqqa janaspaıtynyn jáne eshqandaı derektermen nemese faktilermen rastalmaıtynyn málimdeıdi, – delingen habarlamada.
SІM mundaı jarııalanymdardy Qazaqstan men Reseı arasyndaǵy dástúrli dostyq qarym-qatynastardyń sıpatyn burmalaýǵa baǵyttalǵan negizsiz joramaldar dep baǵalady.
Mınıstrlik Qazaqstannyń tatý kórshilik, ózara qurmet jáne memleketterdiń ishki isterine aralaspaý qaǵıdattaryna negizdelgen beıbitsúıgish ári teńgerimdi syrtqy saıasat júrgizip otyrǵanyn atap ótti.
Sonymen qatar Qazaqstan halyqaralyq quqyq normalaryn jáne halyqaralyq ári óńirlik qaýipsizdik salasyndaǵy mindettemelerin oryndaıtyny aıtyldy.
– Qazaqstan Respýblıkasy óz aýmaǵynyń, áýe keńistiginiń jáne ınfraqurylymynyń basqa memleketterge qarsy baǵyttalǵan is-qımyldardy júzege asyrý úshin paıdalanylýyna jol bermeý qaǵıdatyn berik ustanatynyn taǵy da atap ótemiz, – dep málimdedi SІM.
Osyǵan baılanysty vedomstvo BAQ ókilderi men ózge de tulǵalardy tek tekserilgen derekterge súıenýge jáne shyndyqqa sáıkes kelmeıtin aqparat taratpaýǵa shaqyrdy.
Aıta keteıik, buǵan deıin Qazaqstan aýmaǵynda mıgranttardy ornalastyrý týraly aqparat shyndyqqa sáıkes kelmeıtini habarlanǵan bolatyn.
