Qazaqstan aýqymdy jańǵyrý jolyna túsip jatqanda áıelderdiń jasampazdyq róli arta túsedi

ASTANA. KAZINFORM – Prezıdent qazir Qazaqstan aýqymdy jańǵyrý jolyna túsip jatqan kezeńde áıelderdiń jasampazdyq róli arta túsetinin atap ótti. Bul týraly Aqorda habarlady.

– Respýblıkalyq referendýmǵa shyǵarylǵan halyq Konstıtýtsııasynyń jobasy memleketimizdiń bolashaǵyn, damý baǵdaryn aıqyndaıtyn tarıhı qujat dep aıtýǵa tolyq negiz bar. Álemdegi ahýal ýshyǵyp turǵan ýaqytta jańa Konstıtýtsııa Táýelsizdigimizdiń tuǵyryn nyǵaıtady, elimizdegi barlyq qoǵamdyq-saıası ınstıtýttardyń qyzmetine jańa serpin beredi. Jańa Konstıtýtsııa jobasynyń negizgi arqaýy – Qazaqstannyń Táýelsizdigin, Egemendigi men terrıtorııalyq tutastyǵyn, azamattarymyzdyń quqyqtary men erkindigin qorǵaý. Ata Zańnyń jańa jobasynda kóptegen damyǵan elderde kezdese bermeıtin naqty áleýmettik normalar keńinen qamtylǵan. Men buǵan senimdimin. Konstıtýtsııadaǵy atalǵan erejeler memleketimizdiń áleýmettik sıpatyn kúsheıte túsedi, - dedi Memleket basshysy.

Qazaqstanda halyqty áleýmettik qoldaý júıesi óte jaqsy damyǵan. Memleket osy saladaǵy óz mindettemelerin múltiksiz ári ýaqytyly oryndap keledi. Júzden astam neshe túrli áleýmettik tólemder men jeńildikter bar, tegin qamtamasyz etiletin baǵdarlamalar kóp. 

– Bul – búgingi kúnniń jaǵdaıy. Al biz erteńgi kúnge, alys bolashaqqa qaraýymyz kerek. Eń bastysy – adam kapıtalyn jaqsartyp, ulttyń jańa sapasyn qalyptastyrý. Sondyqtan biz bilimdi, eńbekqor, jasampaz urpaqty, ıaǵnı adal azamattardy tárbıeleýge basa mán berýimiz qajet. Qazirgi tańda dúnıe júziniń árbir túkpirinde adam kapıtaly nemese adam sapasy týraly aıtylyp jatyr. Bul – búgingi tehnologııalyq zamannyń suranysy, talaby. Elimiz úshin bul – asa mańyzdy strategııalyq mindet. Osy iste áıelderdiń róli aıryqsha ekeni sózsiz, - dedi Prezıdent.

Sonymen qatar tarıhymyzda erlik pen eldiktiń týyn bıik ustaǵan arýlar kóp bolǵanyn aıtty.