Qazaqstan men Armenııa agroónerkásiptik ónimder saýdasyn arttyrý úshin jumys tobyn qurady
ASTANA. KAZINFORM — Eýrazııalyq ekonomıkalyq odaqtyń agroónerkásiptik saıasat jónindegi keńesiniń 7-otyrysy aıasynda aýyl sharýashylyǵy mınıstri Aıdarbek Saparov Armenııa Respýblıkasynyń Ekonomıka mınıstri Gevorg Papoıanmen ekijaqty kezdesý ótkizdi.
Taraptar saýda-ekonomıkalyq áriptestiktiń perspektıvalyq baǵyttaryn, aýyl sharýashylyǵy ónimderiniń ózara jetkizilimderin keńeıtýdi, sondaı-aq agrarlyq ǵylym jáne agroónerkásiptik keshendi tsıfrlandyrý salalaryndaǵy yntymaqtastyqty talqylady.
— Armenııa — Qazaqstannyń Ońtústik Kavkazdaǵy mańyzdy seriktesi. 2025 jylǵy qarashada Memleket basshysynyń Armenııa Respýblıkasyna resmı sapary barysynda aýyl sharýashylyǵy ónimderi saýdasyndaǵy yntymaqtastyq týraly memorandýmǵa qol qoıyldy. Bizdiń mindetimiz — Qazaqstannyń eksporttyq áleýetin barynsha ashý, otandyq aýyl sharýashylyǵy ónimderiniń jetkizilimin keńeıtý jáne taýar aınalymynyń turaqty ósýine jaǵdaı jasaý, — dedi Aıdarbek Saparov.
2025 jyldyń qorytyndysy boıynsha Qazaqstan men Armenııa arasyndaǵy AÓK ónimderiniń taýar aınalymy 29%, aýyl sharýashylyǵy ónimderiniń eksporty 44% artty.
Qazaqstannyń dándi jáne maıly daqyldar boıynsha aıtarlyqtaı eksporttyq áleýeti bar.
2025 jyly Armenııaǵa alǵash ret bıdaı partııasy jetkizildi. Bıylǵy jáne aldaǵy jyldary Armenııa naryǵyna bıdaı eksportyn edáýir ulǵaıtýǵa múmkindik bar.
Ózara saýdany keńeıtýdiń perspektıvalyq baǵyttaryna sondaı-aq maıly daqyldar, un, ósimdik maıy jáne makaron ónimderi jatady.
Kelissózder barysynda mal sharýashylyǵy ónimderin, atap aıtqanda shoshqa etin jetkizý máselesine de erekshe nazar aýdaryldy. 2025 jyly Armenııaǵa shamamen 500 tonna shoshqa eti jetkizildi. Taraptar jetkizilim kólemin ulǵaıtý baǵytyndaǵy jumysty jalǵastyrýǵa ýaǵdalasty.
— Biz básekege qabiletti ónimderdiń keń assortımentin usynýǵa jáne logıstıkanyń tıimdiligin arttyrý, sondaı-aq eki el naryqtarynda otandyq óndirýshilerdiń qatysý aıasyn keńeıtý baǵytynda birlesip jumys isteýge daıynbyz, — dep atap ótti mınıstr.
Kezdesý barysynda agrarlyq ǵylym jáne AÓK-ti tsıfrlandyrý salalaryndaǵy ózara is-qımyl jóninde de ýaǵdalastyqqa qol jetkizildi.
Yntymaqtastyqty júıeli túrde damytý jáne ózara taýar aınalymyn ulǵaıtý maqsatynda Aıdarbek Saparov ekijaqty jumys tobyn qurýdy usyndy. Jumys tobynyń negizgi mindetteri — jetkiziletin ónim túrlerin keńeıtý jáne saýda kólemin ulǵaıtý jóninde naqty sharalar ázirleý, sondaı-aq agrarlyq ǵylym men tsıfrlyq sheshimder salalaryndaǵy yntymaqtastyqty damytý.
Kezdesý qorytyndysy boıynsha taraptar Qazaqstan men Armenııa arasyndaǵy áriptestikti odan ári nyǵaıtýǵa, eksporttyq áleýetti ashýǵa, ózara jetkizilimderdi keńeıtýge, sondaı-aq agroónerkásiptik keshende jańa ósý núktelerin qalyptastyrýǵa baǵyttalǵan praktıkalyq sharalardy iske asyrýǵa múddeli ekenderin jetkizdi.
Eske salaıyq, buǵan deıin Qazaqstan Belarýske joǵary qosylǵan quny bar ónim eksportyn ulǵaıtatynyn habarlaǵanbyz.
