Qazaqstan aýyl sharýashylyǵy ónimi eksportyn 10 mlrd dollarǵa jetkizbek
ASTANA. KAZINFORM – Elordada «Kazagro/Kazfarm-2024» halyqaralyq aýyl sharýashylyǵy kórmeleri jumysyn bastady. Úsh kúnge sozylatyn is-sharaǵa álemniń 21 elinen kelgen úzdik 250 agroónerkásip kesheni kompanııasy qatysýda.
«Qazaqstan sııaqty memleketter úshin agroónerkásip kesheni aýyldyń taǵdyry dep aıtsaq artyq emes. Sondyqtan aýyldyń, sol aýylda turatyn azamattardyń bolashaǵy búginde osyndaı jańa tehnologııalarmen baılanysty. Bul kórmelerdiń áriptesi sanalatyn Germanııa 40 kompanııasyn ákelip otyr. Soǵan oraı kórme jaı ǵana tehnologııalardy usyný alańy emes, memleketaralyq qarym-qatynas tiregine aınalyp otyr», - dedi halyqaralyq is-sharanyń ashylýyna sóz alǵan Premer-Mınıstrdiń keńesshisi Eraly Toǵjanov.
Májilis depýtaty, «Aýyl» partııasynyń tóraǵasy Serik Egizbaev búgingi kórmelerde tek qana tek qana agrotehnologııalar ǵana emes, sonymen qatar elimizdiń búkil aýyl halqyna qajetti ári paıdaly jobalar usynylyp otyrǵandyǵyn basa aıtty.
«Májilistiń agrarlyq komıteti bul is-sharaǵa jan-jaqty qoldaý kórsetetin bolady. Bul kórme bizdiń ulttyq agrarlyq brendimiz bolýyn qalaımyz», - dedi ol.
Aýyl sharýashylyǵy vıtse-mınıstri Amanǵalı Berdalın mundaı kórme elimizdiń aýyl sharýashylyǵyn damytýǵa úlken yqpalyn tıgizetindigin atap ótti.
«Qazaqstan Ortalyq Azııada aýyl sharýashylyǵy salasynyń kóshbasshysy sanalady. Búgingi tańda elimiz 20 mlrd dollardyń aýyl sharýashylyǵy ónimin óndiredi. Qaıta óńdeý salasy 6 mlrd dollardy quraıdy. Respýblıkany azyq-túlikpen tolyq qamtamasyz etip otyrmyz. Munyń bári aýyl sharýashylyǵynyń damyp kele jatqanyn kórsetedi. Sońǵy 5 jylda aýyl sharýshylyǵyna tartylatyn ınvestıtsııa kólemi 2,2 ese artyp, 2,2 mlrd dollarǵa jetti. Eksport kólemi 5 mlrd dollarǵa jetti. Aldaǵy 1-2 jylda eksport kólemin 10 mlrd dollarǵa jetkizýdi josparlap otyrmyz», - dedi vıtse-mınıstr.
Dástúrli túrde kórmeler aýyl sharýashylyǵy salasynyń eki negizgi baǵyty boıynsha ótip jatyr. KazAgro ósimdik sharýashylyǵy bóliminde agrarshylarǵa álemdegi eń ozyq jáne joǵary sapaly tehnıkanyń túrlerin usynady. Kórme tuqym tańdaýdan bastap óńdeý tehnologııasyna deıingi búkil óndiris protsesin qamtıdy.
KazFarm - bul mal sharýashylyǵyna arnalǵan, túrli tehnologııalardy tamasha kórsetetin jarqyn jáne qyzyqty ekspozıtsııa. Munda tabysty mal ósirýshiler bordaqylaý alańdary men sút-taýar fermalaryna arnalǵan ónimderdiń tolyq tsıklimen tanysa alady.
