Qazaqstan – Aýǵanstannyń 10 negizgi saýda seriktesiniń biri
«Biz tatý kórshiles Aýǵanstanmen qalyptasqan dástúrli ekonomıkalyq, kólik-logıstıkalyq, energetıkalyq baılanystardy ári qaraı nyǵaıtýǵa múddelimiz. Búgingi tańda Qazaqstan – Aýǵanstannyń negizgi 10 saýda seriktesiniń biri bolyp otyr. Ótken jyldyń qorytyndysy boıynsha eki el arasyndaǵy taýar aınalymy shamamen 1 mlrd dollarǵa jetti. Bul joǵary kórsetkishti arttyryp, aldaǵy ýaqytta 3 mlrd dollarǵa deıin jetkizý kózdelgen», - dedi vıtse-mınıstr elordada ótip jatqan Qazaqstan men Aýǵanstan bıznes-forýmynda.
Spıkerdiń aıtýynsha, Aýǵanstan dástúrli túrde Qazaqstannyń aýyl sharýashylyǵy ónimderin, atap aıtqanda astyq pen undy ımporttaıtyn mańyzdy elderdiń biri. Degenmen, munymen shektelmeı, ózara saýda taýarlarynyń nomenklatýrasyn keńeıtip, ekijaqty yntymaqtastyqtyń berik negizin qurý asa mańyzdy.
«Aýǵanstannyń elimiz sııaqty paıdaly qazbalarǵa baı memleket ekeni belgili. Sonymen birge, Ortalyq jáne Ońtústik Azııa torabynda ornalasqan bul eldiń tranzıttik-kóliktik áleýeti óte zor. Osy turǵyda halyq sany shamamen 220 mln Pákistan naryǵyna shyǵatyn, Pákistan arqyly Taıaý shyǵys, shyǵanaq eldiriniń naryqtaryna shyǵýdy, jańa kólik logıstıkalyq baǵyttaryn qalyptastyrýdy asa mańyzdy dep sanaımyz. Jalpy alǵanda saýda – basymdyqtarymyzdyń biri ǵana. Osy oraıda biz ózge basym baǵyttarda, kólik-logıstıkalyq, energetıkalyq, ınfraqurylymdyq jáne telekommýnıkatsııa salalarynda Aýǵanstanmen birlese jumys isteýge ázir ekenimizdi málimdeımiz», - dedi QR Syrtqy ister vıtse-mınıstri.
Buǵan deıin Qanat Týmysh Almatyda Ortalyq Azııa men Aýǵanstan úshin BUU Óńirlik ortalyǵy qurylatynyn aıtqan edi.
Sońǵy eki jylda Qazaqstan Aýǵanstanǵa 81 vagon azyq-túlikti gýmanıtarlyq kómek retinde jibergen.
