Qazaqstan Aýǵanstannan áketiletin Italııanyń áskerı múlkiniń tranzıtin qamtamasyz etedi

ASTANA. QazAqparat - Parlament Májilisi «Qazaqstan Respýblıkasynyń Úkimeti men Italııa Respýblıkasynyń Úkimeti arasyndaǵy Aýǵanstan Islam Respýblıkasyn turaqtandyrý men qalpyna keltirý jónindegi is-qımyldarǵa Italııa Respýblıkasy Qarýly Kúshteriniń qatysýyna baılanysty Qazaqstan Respýblıkasynyń aýmaǵy arqyly áskerı múlik pen personaldyń tranzıtin qamtamasyz etý týraly kelisimdi ratıfıkatsııalaý týraly» zań jobasyn maquldady.

Atalǵan kelisim 2013 jyldyń 19 aqpanynda Astanada jasalǵan bolatyn.

Qujat Aýǵanstandy turaqtandyrý men qalpyna keltirý jónindegi halyqaralyq is-qımyldardy qoldaý maqsatynda Qazaqstan aýmaǵy arqyly Italııanyń áskerı múlki men personalynyń tranzıtin júzege asyrý tártibi naqtylanady.

Bul rette áýe kemeleriniń tranzıti QR Syrtqy ister mınıstrligi áýe keńistigin paıdalaný týraly berilgen ruqsattary arqyly júzege asady. Sonymen qatar, Qazaqstan tarapy ondaı tranzıt barysynda áýe kemelerine aeronavıgatsııalyq alymdardy tólete otyryp, tıisti aeronavıgatsııalyq qyzmetterdi usynatyn bolady.

Al áskerı múliktiń temirjolmen tranzıti arnaıy ruqsattyń negizinde júzege asady. «Qazaqstan aýmaǵynda bir mezgilde bolatyn áskerı múliktiń sany bir temirjol quramymen qatań shektelýi tıis», delingen zań jobasyna túsindirme jazbada.

Mundaı tranzıtke baılanysty shyǵystardy Italııa tarapy óz moınyna alatyn bolady.