Qazaqstan Aýǵanstanmen saýda yntymaqtastyǵyn arttyrady

ASTANA. QazAqparat – Elimizdiń Aýǵanstanmen saýda qarym-qatynasyndaǵy basym ónimder ataldy. Atalǵan elmen saýda yntymaqtastyǵy arta túspek. Bul týraly Premer-Mınıstriniń orynbasary – Saýda jáne ıntegratsııa mınıstri Serik Jumanǵarın málim etti, dep habarlaıdy QazAqparat tilshisi.

«Biz Aýǵanstanmen yntymaqtasamyz, saýdany damytamyz. Ekijaqty saýda 1 mıllıard dollardy quraıdy. Bul Ázerbaıjan, Túrkimenstanmen aradaǵy saýdaǵa qaraǵanda áldeqaıda kóp. Osy oraıda saýda yntymaqtastyǵyn odan ári arttyramyz. Aýǵanstanmen ekijaqty saýdada bıdaı, un, kúnbaǵys maıy basymdyqqa ıe. Nelikten bul múmkindikten bas tartýymyz kerek? Bul, saıyp kelgende, bizdiń memleketimizge paıda ákeledi», - dedi Serik Jumanǵarın Úkimet otyrysynan keıin BAQ ókilderiniń saýalyna bergen jaýabynda.

Sondaı-aq, mınıstr Aýǵanstanda saýda úıi ashylyp, oǵan arnaıy ókil taǵaıyndalǵanyn aıtty.

«Resmı ókil jumysty úılestirýge jaýapty, óıtkeni Aýǵanstannyń aýmaǵy úlken ári ártúrli. Endi ekijaqty saýdany damytýda naryqty zerdelep, jergilikti kásipkerlermen tanysý qajet. Aýǵan kásipkerlerin osynda shaqyryp, bıznes-forým ótkizgim keledi. Olarǵa bizdiń múmkindikterimizdi kórsetken jón», - deıdi ol.

Qazaqstan Aýǵanstannyń Gerat qalasynda saýda úıin ashatynyn habarlaǵan edik.